“АҠБУҘАТ” БАЛАЛАР ЖУРНАЛЫ СЫҒА БАШЛАУҒА – 30 ЙЫЛ

“Аҡбуҙат” – боронғо эпостың исемен йөрөткән, Башҡортостан Республикаһының йөҙөн билдәләгән балалар баҫма. Тәрбиәүи, әҙәби, тарихи, танып белеү тураһындағы яҙмаларҙы туплаған, айына бер тапҡыр сыҡҡан башҡорт телендәге журналдың аудиторияһы – донъяға саҡ тауыш биргән кескәй башҡорттан алып башланғыс класс уҡыусыларына тиклем. Баҫмаға 1990 йылда нигеҙ һалынған, әммә тәүге һаны ғинуарҙа донъя күргән. Беренсе баш мөхәррире – Башҡортостандың халыҡ шағиры Факиһа Туғыҙбаева. Унан һуң баҫманы Тамара Юлдашева етәкләгән.
Журнал күп тапҡырҙар Мәскәүҙә үткән “Матбуғаттың алтын фонды” халыҡ-ара күргәҙмәһендә иң шәп баҫма булараҡ билдәләнгән. 2012 йылда “Аҡбуҙат” Рәсәй Журналистар союзы ойошторған илдең кескәйҙәр өсөн сығарылған баҫмалары араһында “Бәләкәй принц” Бөтә Рәсәй конкурсы еңеүсеһе булды.
2020 йылдың сентябрендә баҫма Башҡортостан Башлығы грантына “Урал батыр” йәнһүрәтен сығарҙы. Ошо уҡ йылда Рәсәй Федерацияһының Пермь өлкәһендә йәшәгән Ғәйнә ырыуының кескәй башҡорттары өсөн 13-сө һан нәшер ителде. Башҡорт теле йылында редакция хеҙмәткәрҙәре республиканың ике дәүләт телендә “Ҡояш ҡыҙы иленән” китабын баҫтырыуға өлгәште. Унда журнал тарафынан ойошторолған конкурста еңеүсе балаларҙың шиғырҙарын Рәсәйҙә билдәле яҙыусылар – Рәсәй Яҙыусылар союзы секретары Нина Ягодинцева, Дағстандың халыҡ шағиры Марина Ахмедова-Колюбакина, Башҡортостанда билдәле шағирҙар Сергей Янаки, Светлана Чураева, Кристина Андрианова, “Корифейҙар” фестивалендә ҡатнашҡан Юрий Татаренко, Евгения Решетникова тәржемә итте.
2021 йылда баҫма альтернатив яҙылыу нигеҙендә яңы ойошторолған тарихи-мәҙәни үҙәктәр ярҙамында Свердловск, Ырымбур, Силәбе, Һамар, Һарытау өлкәләрендә, Пермь крайында, Ханты-Манси автономиялы округында йәшәгән бәләкәстәргә лә барып етәсәк.
Журнал бөгөн баҫма вариантта ғына түгел, электрон форматта, бар социаль селтәрҙәр аша үҙ уҡыусыһына юл таба. “Аҡбуҙат” тарафынан ойошторолған барлыҡ конкурстар социаль селтәрҙәрҙә ойошторола, шуға башҡорт телендә тарихи, мәҙәни, тәрбиәүи мәғлүмәт таратыуҙа, тотош милләттең киләсәген үҫтереүҙә уның роле ҙур.
Бөгөн баҫмала балалар яҙыусылары Миңлегөл Тайсина, Зөбәйҙә Исламова, Гөлнара Мостафина, йәш быуын шағирәһе Айгөл Йәмилева эшләй. Кескәйҙәр өсөн сағыу һәм тәрбиәүи әһәмиәткә эйә булған һүрәттәрҙе республикала ғына түгел, Рәсәйҙә билдәле рәссамдар Азамат Ғарипов, Сулпан Билалова, Майя Ҡәйүмова, Артур Вәсилов, Салауат Ғиләзетдинов, Лиана Ниғмәтйәнова, Сергей Эйтвид, Ирина Әхмәҙуллина, Дамир Мөхәмәтйәров эшләй. Баҫманы шағирә Лариса Абдуллина етәкләй.