Почтаның эше туҡтамай

Башҡортостандың Федераль почта элемтәһе идаралығының матбуғат хеҙмәтенән хәбәр итеүҙәренсә, был айҙа почтальондар пенсияны графиктан алдараҡ, 15 апрелгә тиклем тарата.

Әгәр почтальон килгәндә хужа өйҙә булмаһа, пенсияны ҡайтанан алып килеүгә ғаризаны 22 апрелгә тиклем яҙырға мөмкин. Әле пенсияны, йәкшәмбенән тыш, көн һайын тараталар. Халыҡҡа бындай хеҙмәт күрһәткән берҙән-бер ойошма булараҡ, Рәсәй почтаһы ҡатмарлы эпидемиологик хәлдә өлкәндәр өйҙә ҡалһын өсөн шарттар тыуҙырырға тырыша.

“Башинформ” хәбәр итеүенсә, апрелдә пенсиялар, шулай уҡ башҡа түләүҙәр уларҙы әлегә тиклем почта бүлексәләренән алғандарға ла өйгә килтерелә.

Республикала дүрт меңдән ашыу почтальон иҫәпләнә һәм уларҙың барыһы ла үҙаллы изоляция осоронда махсус кейемдә эшләргә тейеш. Йорт хужалары менән тура бәйләнешкә ингән хеҙмәткәрҙәр үҙҙәренең дә, яҡташтарының да сәләмәтлеге хаҡында уйларға бурыслы.

-Пандемия хәүефе янаған осраҡта ла тормош туҡтап ҡалмай, өлкәндәргә пенсия таратып, коммуналь хеҙмәттәр өсөн түләүҙәрҙе үткәрергә кәрәк. Пенсия таратыусыларҙың һәммәһе лә махсус кейемдә эшләргә мәжбүр, сөнки уларҙы һаҡланыу саралары күрелә. Әлбиттә, махсус кейемдә эшләү почта хеҙмәткәрҙәре өсөн ғәҙәти булмаған күренеш. Аҡ костюмда эҫе, тын алдырмай, өйҙәр буйынса йөрөп сыҡҡансы тирләп-бешеп сығалар. Күбеһенсә яңы аҡсалар таратыла, араларында иҫкеләре лә бар, әммә улар даими эшкәртелә. Почта кассаларына ла икешәр кешенән артыҡ индерелмәй. Ҡалғандар коридорҙа үҙ сиратын көтә. Хеҙмәтләндереүгә үткәрелгән ике клиенттың араһы ла 1,5 метр булырға тейеш. Бының өсөн махсус билдәләр ҡуйылған, - ти Аҡъяр почта бәйләнеше бүлексәһе начальнигы Миңзәлә Игитбашян.

Район ауылдарында йәшәүселәр почтальондарҙы көтөп ала, әммә өлкән йәштәгеләрҙе хеҙмәтләндереү хәүефһеҙлек ҡағиҙәләре үтәлеүен талап итә. Район үҙәгенән килгән почта хеҙмәткәрҙәре документтарҙы метр ярым алыҫлыҡта тапшыра. Ихатаға инер алдынан ҡулдар антисептик менән таҙартыла.

Эйе, почтальондар изоляция осоронда һаҡланыу саралары мөһим тигән фекерҙә. Хәүефһеҙлек ҡағиҙәләре теүәл үтәлгәндә яҡшы хәбәрҙәр яҙылған хаттар ҙа, ғәҙәти көндәр ҙә тиҙерәк әйләнеп ҡайтыр тигән өмөт уята.