+22 °С
Болотло
Яңылыҡтар
8 Апрель 2020, 11:37
Радий Хәбиров Башҡортостандың иҫтәлекле урындарына тәүге күрһәткестәрҙең фотоһы менән бүлеште
-
Башҡортостанда иҫтәлекле урындарҙың һәм туристик объекттарҙың беренсе күрһәткестәре менән таныштырҙылар. Халыҡ-ара стандарттарға ярашлы эшләнгән, рус һәм инглиз телдәрендәген яҙыуҙар менән тәүге күрһәткестәрҙе республика башлығы Радий Хәбиров үҙенең сәхифәһенә һалды.
Республика башлығы миҫал итеп башҡорт мәғрифәтсеһе Мөхәмәтсәлим Өмөтбаевтың Ҡырмыҫҡалы районында урынлашҡан музейына күрһәткесте килтерҙе.
«Тиҙҙән тотош республикала бына шундай билдәләр эленеп торор. Беҙҙә яҡшы туристик объекттар бик күп. Ләкин уларҙы табыуы еңелдән түгел. Салауат Нафиҡов, был — ведомствоғыҙҙың тәүге кескәй еңеүе. Артабан да шулай дауам итегеҙ!» — тип яҙҙы Радий Хәбиров.
Бынан алда «Башинформ» республикала ҡыҙыҡлы туристик объекттарға илткән 108 күрһәткес ҡуйыу планлаштырылыуын хәбәр иткәйне. Исемлектә популяр объекттар ҙа, аҙ билдәле, мәҫәлән, ҡыҙыҡлы музейҙар һәм ҡорамдар ҙа бар. Күрһәткестәр федераль, төбәк трассаларында һәм урындағы әһәмиәткә эйә юлдарҙа ҡуйыла. Объекттар араһында – Шүлгәнташ мәмерйәһе, Ирәмәл тауы, Ар ташы, Нөгөш һәм Йомағужа һыу һаҡлағыстары, «Башҡортостан» милли паркы һәм башҡалар.
Башҡортостан Республикаһының Туризм буйынса дәүләт комитеты етәксеһе Салауат Нафиҡов әйтеүенсә, туристик күрһәткестәр өҫтөндә эшләүгә бер нисә ведомство: Туризм буйынса дәүләт комитеты, Эшҡыуарлыҡ буйынса дәүләт комитеты, Транспорт һәм юл хужалығы буйынса дәүләт комитеты, шулай уҡ «Башкиравтодор» йәлеп ителде. Күрһәткестәр республика юлдары өсөн юл билдәләре етештерелгән «Ремстройдормаш» заводында әҙерләнә.
