+23 °С
Болотло
Яңылыҡтар
3 Апрель 2020, 12:59
«Халыҡ контролерҙары» район магазиндарында аҙыҡ-түлек хаҡтарына мониторинг уҙғарҙы
*
Хәйбулла районында «Берҙәм Рәсәй» партияһының «Халыҡ контроле» проекты ҡулланыусылар кәрзиненә хаҡтарға мониторинг уҙғарҙы.
Эш төркөмө Аҡъяр һәм Бүребай ауылдарында магазиндарҙы тикшерҙе. Бының сәбәбе – аҙыҡ-түлектең ҡайһыларына хаҡтың ҡырҡа артыуына халыҡтың зарланыуы. Мәҫәлән, лимон һәм имбиргә хаҡ күтәрелгән. Лимонға барлыҡ баҙарҙарҙа хаҡтар 500 һумға тиклем, ә имбиргә – 5000 һумға ҡәҙәр артҡан. Барлыҡ һатыусылар һүҙҙәренсә, хаҡтарҙың күтәрелеүе күмәртәләп һатыу базаларынан килә. Күренеүенсә, бында алыпһатарҙар коронавирус киҙеүе нигеҙендә “байып” алырға булғандар.
Районда активсылар «Магнит», «Пятёрочка», «Монетка», «Купец» магазиндары һәм күмәртәләп һатыу баҙары буйлап рейд яһаны. Уның һөҙөмтәләре буйынса, карантин осоронда барлыҡ сауҙа нөктәләрендә лә хәүефһеҙлек саралары башҡарылмауы асыҡланды. Бәләкәй майҙанлы магазиндарҙа һатып алыусылар араһында дистанция үтәлмәй. Күмәртәләп һатыу баҙарында иң күп ҡағиҙә боҙоуҙар күҙәтелде. Бында һатыусылар бирсәткә менән файҙаланмай, ә битлеге булғандары – уны дөрөҫ кеймәйҙәр.
Тикшереүселәрҙе шулай уҡ граждандарҙың үҙ сәләмәтлегенә битарафығы ғәжәпләндергән. Магазиндарҙа һәм урамдарҙа башлыса оло быуын вәкилдәре йөрөй, ә улар бит карантинда өйҙә ултырырға тейеш.
«Беҙҙең хәстәрлек» («Наша забота») проектының ирекмәндәре аҙыҡ-түлек алыуҙа ярҙам итә ала. Бының өсөн «Берҙәм Рәсәй» төбәк колл-үҙәгенең тәүлек әйләнәһенә эшләгән телефонға 8-800-201-89-03 шылтыратырға кәрәк.
Шулай уҡ «Берҙәм Рәсәй» партияһының Хәйбулла районындағы бүлексәһенең Бәйләнештә төркөмөндә һеҙҙең тораҡ пункттарҙағы магазиндарҙа хаҡтар тураһында яҙыуҙы һорайҙар. Хәҙер барлыҡҡа килгән хәл иҫәбенә байып ҡалырға маташҡан намыҫһыҙ алыпһатарҙарға мөмкинлек бирергә ярамай.
Фото:Хәйбулла районы хакимиәте сайты
