+23 °С
Болотло
Яңылыҡтар
7 Февраль 2020, 12:33
Ғаилә тарихынан – ил тарихына
«Рәсәйҙең үлемһеҙ полкы» хәрәкәте мәктәп уҡыусылары араһында «Еңеүселәр вариҫтары-2020» тикшеренеүҙәр эше конкурсына старт бирҙе.
«Рәсәйҙең үлемһеҙ полкы» хәрәкәте «Еңеүселәр вариҫтары-2020» тикшеренеүҙәр эше конкурсына старт бирҙе. Быйыл ул халыҡ-ара статусҡа эйә булды: бында Рәсәйҙән һәм сит илдәрҙән 11 йәштән алып 18 йәшкә тиклемге мәктәп уҡыусылары ҡатнаша ала. Бының өсөн www.pravnuki-pobediteley.ru сайтында теркәлеү зарур.
Конкурс ғаиләләрҙә Бөйөк Ватан һуғышы яугирҙары тураһында иҫтәлекте һаҡлауға, быуындарҙың күсәгилешлеген тәьмин итеүгә, архив материалдары менән эш итеү буйынса оҫталыҡ туплауға йүнәлтелә.
Проекттың төп тезисы – «Ғаилә тарихынан – ил тарихына». «Рәсәйҙең үлемһеҙ полкы» хәрәкәте етәксеһе билдәләүенсә, конкурста ҡатнашыу арҡаһында мәктәп уҡыусылары үҙ ғаиләһенең фронт тарихы менән яҡшыраҡ белә һәм архивтар менән эшләргә өйрәнә, шулай уҡ туғандарының Бөйөк Ватан һуғышында бергә булған яуҙаштары, полкташтарының вариҫтары менән таныша ала. Шулай уҡ был бәйге балаларға һәм уларҙың атай-әсәйҙәренә үткән замандарға сумырға һәм ата-бабалары йәшәгән ошо ауыр йылдарҙы онотмаҫҡа мөмкинлек бирә.
Конкурста ҡатнашыусыларға 15 мартҡа ҡәҙәр ветерандың хеҙмәт йәки хәрби юлын тикшерергә һәм тәҡдим ителгән һорауҙар буйынса инша яҙырға кәрәк. Бының өсөн мәктәп уҡыусылары Рәсәй Федерацияһы Оборона министрлығының асыҡ архивтарын, һуғыш осорондағы гәзит һәм журналдарҙы, шулай уҡ ғаиләләрҙә һаҡланып ҡалған хаттарҙы, документтарҙы, фотоһүрәттәрҙе өйрәнергә тейеш.
Бәйгелә еңеүселәр Мәскәүгә саҡырылып, 9 майҙа Ҡыҙыл майҙанда «Үлемһеҙ полк» сафында парадта ҡатнашыу хоҡуғын аласаҡ.
Әйткәндәй, уҙған йылда конкурста Рәсәйҙең төрлө төбәктәренән 10 меңгә яҡын бала ҡатнашты.
