Телде үҫтергән — илде үҫтерер

21 февраль – һәр халыҡтың үҙ телен ҙурлау көнө. Үҙ илеңдә үҙ телеңде белеп йәшәү – һәр беребеҙҙең изге бурысы.  Тел-ул кешенең күңел байлығын, зиһенен, аҡылын, рухи донъяһын сағылдырыусы.

Үҙәк район китапханаһының башҡорт әҙәбиәте һәм тыуған яҡты өйрәнеү бүлегендә  2 –се һанлы Аҡъяр урта мәктәбенең 7 класс уҡыусылары өсөн  «Туған тел – тормош сығанағы» исемле  әҙәби сара үткәрелде.

Бөтә донъя туған телдәр көнөнә арналған әҙәби сара ла уҡыусылар  халыҡ шағиры Ҡәҙим Аралбаевтың «Үҙ телемдә һиңә өндәшәм»  исемле туған телмәребеҙҙең моңон  данлаған шиғырын тыңланылар,  халыҡ-ара туған тел   көнөнөң    барлыҡҡа килеү тарихы, телебеҙҙе һаҡларға һәм яҡларға кәрәклеге һәм  «Халҡыбыҙҙың рухи хазинаһы» исемле китап күргәҙмәһе менән  танышып үттеләр.

Әҙәби сараны дауам итеп, тел һәм мәҙәниәт өлкәһендә белемдәрен тағыла юғарыраҡ кимәлгә күтәрергә   тигән изге маҡсат  менән район мәҙәниәт йортоноң халыҡ ижады  үҙәге методисы Миңзифа Ибраһим ҡыҙы Ишемғолова  менән берлектә «Алтын тирмә» уйыны үткәрелде.

Уҡыусылар  «Батырҙар» һәм «Зирәктәр» исемле ике командаға бүленеп аҡыл, белемдә көс һынашып, үҙ халҡының күңел хазинаһын – илаһи йырҙарын, мөғжизәле әкиәттәрен, тәрән аҡыллы мәҡәл-әйтемдәрен дауам иттеләр, серле йомаҡтарын систеләр.

Башҡорт ҡатын-ҡыҙҙарының иң сағыу биҙәүестәре —  «Традицион селтәр», «Үҫмер ҡыҙ бала өсөн селтәр», «Йәш-елкенсәк өсөн селтәр», «Заманса стилләштерелгән селтәр»ҙәр һәм ир-егеттәрҙең «Ҡусҡар» биҙәге сигеп тегелгән  янсыҡтарҙың үҙебеҙҙең төбәккә хас булған биҙәлеше, әйтелеше һәм ҡыҫҡаса тарихы менән танышып, рухи байлыҡ тупланылар.

Сара һуңынан еңеүсене билдәләп тәңкәләрҙе һанағанда «Зирәктәр»ҙең тәңкәләре  күберәк, «Батырҙар»ҙың  бер нисәгә әҙерәк булыуы билдәле булды.

Туған тел кешене белемле, аҡыллы, йыйнаҡ фекерле, тотанаҡлы, ғилем донъяһына ынтылыусан итеп тәрбиәләй. Кешенең үҙ иленең патриоты, үз халҡының улы, ҡыҙы булыуы ла туған телгә бәйләнгән. «Телде үҫтергән — илде үҫтерер»,- ти халыҡ мәҡәле. Ошо мәҡәлгә таянып үҙ телебеҙҙә күберәк аралашырға һәм әҙәби китаптарҙы күберәк уҡырға тигән изге ниәт менән тамамланды әҙәби сара.