Башҡорт драма театры 105 йыллыҡ юбилейын билдәләне

4 декабрҙә Мәжит Ғафури исемендәге Башҡорт академия драма театрында уның ойошторолоуына 105 йыл тулыуға арналған юбилей тантаналары үтте. Ошо уңайҙан коллективты Башҡортостандың мәҙәниәт министры вазифаһын башҡарыусы Әминә Шафиҡова ҡотланы.

– Данлыҡлы театрҙы 105 йыллығы менән ҡотлау – оло мәртәбә һәм бәхет. Театрға башҡорт халҡының традицияларын, мираҫын, башҡорт драматургияһын һаҡлауы өсөн рәхмәт әйткем килә. Бөгөн ул милли театрҙар араһында флагман, яңы традицияларға нигеҙ һалыусы булып тора, – тип билдәләне Әминә Шафиҡова. – Актерҙарға һәм хеҙмәткәрҙәргә ижади коллективта быуындар күсәгилешлеге өсөн рәхмәт белдерәм, өлкән быуындың – йәш коллегаларына, ә йәштәрҙең остаздарына ихтирам менән ҡарауы күренә. Театрға яңы спектаклдәр һәм рәхмәтле тамашасылар теләйем!

Театр коллективына маҡтаулы исемдәр һәм наградалар тапшырылды. Артист Алмас Әмиров – Салауат Юлаев ордены, Минзәлә Хәйруллина – «Хеҙмәт батырлығы өсөн» миҙалы, директор Иршат Фәйзуллин һәм актриса Сара Буранбаева Башҡортостан Республикаһының Почет грамотаһы менән бүләкләнде.

Актриса Римма Ҡаһармановаға – «Башҡортостан Республикаһының халыҡ артисы», директорҙың иҡтисад һәм финанс буйынса урынбаҫары – баш бухгалтер Зөлфиә Ғәйнетдиноваға «Башҡортостан Республикаһының атҡаҙанған иҡтисадсыһы» тигән маҡтаулы исемдәр бирелде. Кинорежиссер, видеомейкер Руслан Юлтаев – «Башҡортостан Республикаһының атҡаҙанған мәҙәниәт хеҙмәткәре», актриса Айһылыу Йомағолова – «Башҡортостан Республикаһының атҡаҙанған артисы», режиссер Илсур Ҡаҙаҡбаев «Башҡортостан Республикаһының атҡаҙанған сәнғәт эшмәкәре» исемен алды.

Театр коллективын шулай уҡ Башҡортостандың Театр эшмәкәрҙәре союзы рәйесе урынбаҫары, Башҡорт дәүләт опера һәм балет театры солисы, Рәсәйҙең атҡаҙанған артисы, Башҡортостандың халыҡ артисы Йәмил Әбделмәнов ҡотланы. Хөрмәтулла Үтәшевҡа, Гүзәл Маликоваға, Руслан Хайсаровҡа — республика Театр эшмәкәрҙәре союзының маҡтау грамоталары, ә актер Алмас Әмировҡа Станиславский исемендәге Көмөш миҙал тапшырылды. «М. Ғафури — XXI быуат» мәҙәниәт фонды етәксеһе Люциә Камаева «Ҡара йөҙҙәр» спектаклендә уйнаған артистарҙы фондтың Рәхмәт хаттары менән бүләкләне. Юбилей кисәһендә Айрат Абушахмановтың «Ҡара йөҙҙәр» спектакле күрһәтелде.

Мәжит Ғафури исемендәге Башҡорт академия драма театры 1919 йылдың 4 декабрендә Стәрлетамаҡта ойошторола. Театрҙың күп йыллыҡ тарихында ижади коллектив төрлө спектаклдәр сәхнәләштерҙе, улар республиканың ғына түгел, илебеҙ театр сәнғәтенең «алтын фонды»на инде.

Автор:Ләйлә Аралбаева