Салауат Юлаев исемендәге дәүләт премияһы лауреаттары иғлан ителде

Башҡортостанда Салауат Юлаев исемендәге дәүләт премияһы лауреаттарының исемдәре иғлан ителде. Республика Башлығы указы менән күренекле әҙәбиәт, сәнғәт һәм архитектура эшмәкәрҙәре абруйлы дәүләт премияларын алды.

Архитектура өлкәһендә Салауат Юлаев исемендәге дәүләт премияһына Өфө хосписы проекты өсөн «Башкиргражданпроект» проект институты хеҙмәткәрҙәре: генераль директор урынбаҫары — баш архитектор Роберт Александров һәм бүлек начальнигы — 1-се комплекслы оҫтахананың баш белгесе, комплекслы оҫтахананың архитектура төркөмө етәксеһе Марина Завиская лайыҡ булды.

Сәнғәт өлкәһендә әлеге премияны Рәсәй Геройы, 112-се Башҡорт кавалерия дивизияһы командиры, генерал-майор Миңлеғәле Шайморатов һәйкәле өсөн Рәсәйҙең халыҡ рәссамы Салауат Щербаков алды.

Шулай уҡ «Төньяҡ Амурҙары» тулы метражлы анимация фильмын төшөргән «Муха» йәмғиәте директоры Артур Абдрахманов, «Башҡортостан» киностудияһы директоры Юнир Әминев, рәссам-карикатурист Камил Буҙыҡаев дәүләт премиялары менән билдәләнде.