Башҡорт рок-фестивален асыу тантанаһында «Рух» төркөмө йырсылары һәм музыканттары тәбрикләнде

Аҡъярҙа «Уңыш» стадионында йәйҙең иң сағыу тамашаларының береһе «Бөйөк дала» VI асыҡ республика башҡорт рок фестивале гөрләп уҙҙы.  Мәртәбәле мәҙәни сара ике йылға бер тапҡыр ойошторола. «Бөйөк дала» рокерҙарҙы тәүге тапҡыр 2011 йылда «Рух» рок-төркөмөнөң 20 йыллығына йыйғайны. Хәҙер инде меңәрләгән тамашасы уны көтөп ала.

Рок-фестивалде асыу тантанаһында хөрмәтле ҡунаҡтар: Башҡортостан мәҙәниәт министры урынбаҫары Ринат Ғайсин, Хәйбулла районы хакимиәте башлығы Рөстәм Шәрипов,  Республика халыҡ ижады үҙәгенең генераль директоры Салауат Кирәев, Рәсәй Федерацияһының һәм Башҡортостан Республикаһының халыҡ артисы Хөрмәтулла Үтәшев, Ырымбур өлкәһе башҡорттары ҡоролтайы рәйесе Йәғәфәр Яманһарин ҡатнашты.

Бүләкләү тантанаһында «Рух» халыҡ вокаль-инструменталь ансамбле ҡатнашыусылары Башҡортостан Мәҙәниәт министрлығының Рәхмәт хаттары менән бүләкләнде. «Рух» рок-төркөмөнөң етәксеһе Юлай Асҡаровҡа Башҡортостан Мәҙәниәт министрлығыныңн Почет грамотаһы һәм Ырымбур өлкәһе башҡорттары ҡоролтайының рәхмәт хаты тапшырылды.  Й.Иҫәнбаев исемендәге Аҡъяр балалар сәнғәт мәктәбе ҡарамағындағы «Бөркөт» төркөмө етәксеһе Байрас Әминевҡа  Республика халыҡ ижады үҙәгендә йыр яҙҙырыуға сертификат бирелде.