"Айыҡ ауыл 2021" республика конкурсында еңеүсе булған Бәләкәй Арыҫланғолға килгән Бөтә донъя башҡорттары ҡоролтайын президиумы ағзаһы Сәлиә Мырҙабаева һәм Бөрйән, Йылайыр райондарынан, Сибай ҡалаһынан килгән ҡунаҡтар ауыл тормошо менән ҡыҙыҡһынып, вәзәмдәр уҙғарған балаҫ һуғыу, кейеҙ баҫыу буйынса оҫталыҡ дәрестәрен ҡараны. Бәләкәй Арыҫланғолды хаҡлы рәүештә халыҡ кәсептәре оҫталары төйәге тип әйтергә мөмкиндер. Уңғанлығы, бөтмөрлөгө, тырышлыҡтары менән һәр башланғыстарын бергәләп бойомға ашырған вәзәмдәрҙең ҡул эштәре килгән ҡунаҡтарҙы ла хайран ҡалдырҙы. Улар Бәләкәй Арыҫланғолдарға боронғо кәсептәрҙе тергеҙеүҙә һәм популярлаштырыуҙа уңыштар теләне.