Аҡъяр һылыуҡайы һынатманы!

Серго Орджоникидзе исемендәге Рәсәй дәүләт геология-разведка университетында «Мәскәү һылыуҡайы - 2023» матурлыҡ конкурсы үтте. Баш ҡала юғары уҡыу йорттарының иң матур һәм талантлы 10 студенты беренсе һылыуҡай титулы һәм тажы өсөн көрәште.

Шарттар буйынса, конкурста башҡорт милләтенән булған йәш ҡыҙҙар ҡатнаша алды. Ҡатнашыусылар традицион башҡорт һөнәрҙәре, халыҡ бейеүҙәре һәм йырҙары аша үҙҙәренең оҫталыҡтарын күрһәтте, шулай уҡ матурлыҡ, интеллект, мәҙәни мираҫ һәм талант категориялары буйынса баһа алды.

Бөтә этаптар йомғаҡтары буйынса Гран-приға Өфөнән Айһылыу Ишбаева лайыҡ булды, беренсе вице-мисс - Туймазынан Рената Ғәниева, икенсе вице-мисс - Өфөнән Алина Мәжитова, ә өсөнсөлә - Аҡъярҙан Резеда Ҡотлобирҙина. Шулай уҡ яҡташыбыҙ "Һөйкөмлө Һылыуҡай" номинацияһына эйә булды.

Конкурста еңеүсе Бөтә донъя Башҡорттары ҡоролтайынан ҡашмау (милли баш кейеме) алды, ә ҡалған ҡатнашыусыларға бағымсыларҙан бүләктәр тапшырылды.

Конкурсты ойоштороусылар булып Серго Орджоникидзе исемендәге Рәсәй дәүләт геология-разведка университеты, республиканың РФ президенты ҡарамағындағы тулы хоҡуҡлы вәкиллеге, Мәскәүҙә Башҡортостандың власть органдары эшмәкәрлеген тәьмин итеү буйынса аппарат, Мәскәүҙә Һәм Санкт-Петербургта Башҡортостан студенттары һәм аспиранттары ассоциацияһы, шулай уҡ «Ясмин» ижади студияһы сығыш яһаны.

«Башинформ» агентлығына ойоштороусылар хәбәр итеүенсә, был ваҡиға башҡорт йәштәре араһында көтөлгән ваҡиғаларҙың береһе булып тора. Конкурс республика менән Мәскәү араһында мәҙәни алмашыу сиктәрендә уҙғарыла һәм Башҡортостандың мәҙәни мираҫына һәм йолаларына иғтибарҙы йәлеп итеүҙе бурыс итеп ҡуя.