Башҡорт фольклор коллективы солистары «Поле чудес»та ҡатнашты

Мәскәүҙең «Аҡ тирмә» башҡорт фольклор коллективы солистары Лилиә һәм Ринат Хәбировтар Беренсе каналдың «Мөғжизәләр яланы» капитал-шоуында ҡатнашты.  Улар Башҡортостандың Мәсетле районында тыуып үҫкән. Күп йылдар инде Мәскәүҙә йәшәгән яҡташтарыбыҙ милли йыр-бейеү сәнғәтенең бай традицияларын пропагандалай.

Тапшырыуҙың сығарылышы 14 апрелдә киске сәғәт 8 тула 15 минутта күрһәтелде.

Йола буйынса, билдәле фольклор коллективы артистары студияға милли кейемдә килде.

«Ринат башҡорт халыҡ йыры «Ҡара юрға»ны башҡарҙы, Лилиә бейене. Күстәнәскә Лилиә әсәһе менән ваҡ бәлеш бешергән», — тип һөйләне «Башинформ» агентлығына «Аҡ тирмә» ансамбле етәксеһе Гөлсинә Батыршина.

Хәтерергеҙгә төшөрәбеҙ, «Аҡ тирмә» башҡорт милли-мәҙәни үҙәге 2014 йылдан Рәсәйҙең баш ҡалаһында яҡташтарҙы берләштереү, башҡорт мәҙәниәтен һаҡлап ҡалыу һәм үҫтереү буйынса эшмәкәрлек алып бара. 2022 йылда «Аҡ тирмә» фольклор коллективы ағзалары «Мөғжизәләр яланы» капитал-шоуының яңы йыл сығарылышында ҡатнашты.

Автор:Ләйлә Аралбаева