“Ҡытайҙар мине ҡайҙан белгән?”

Ишморат Ҡәйүм улы Илбәков 1963 йылда Хәйбулла районының Ғәлиәхмәт ауылында тыуған. Ата-әсәһе –  Ырыҫбикә менән Ҡәйүм Илбәковтар.

Ишморат Ҡәйүм улы бала саҡтан гармунда, тальянда оҫта уйнай. 1978 – 1982 йылдарҙа Өфө сәнғәт училищеһында ҡурайҙа уйнарға өйрәнә. 1982 – 1984 йылдарҙа Камчаткала армия сафында хеҙмәт итә. 1996 йылда Ҡорманғаҙы исемендәге Ҡаҙаҡ милли консерва­торияһының халыҡ музыкаһы факультетын тамамлай.

Ишморат Илбәков хроматик ҡурай (ишҡурай) уйлап тапҡан һәм патентлаған. Мәскәү ҡалаһында Олимпиада-80 һәм XII Халыҡ-ара йәштәр һәм студенттар фестиваленең мәҙәни программаларында ҡатнаша, Ҡыҙылда “Коолай” фестивале лауреаты була. Рәсәй, Европа, АҠШ ҡалаларында концерттар менән сығыш яһай.

– Үҙегеҙ тураһында бер-ике һүҙ әйтегеҙ әле?

­– Кәләшем әйтмешләй, мин – ҡыҙыҡ кеше, күп яҡлы, оригиналь шәхес. Был, минеңсә, тәрбиәнән килә. Атай- әсәйем донъя күргән кешеләр ине. Мәҫәлән, башҡа балалар Бөйөк Ватан һуғышы тураһында китаптан йәки кинонан ҡарап белгәндә, минең атайым күргәндәрен, башынан үткән ысын­барлыҡты һөйләй ине. Ул 1910 йылғы, мин тыуғанда уға 53 йәш булған. Тормошто бик ярата ине. Мин дә ғүмерем буйы уға оҡшарға тырышам.

– Йондоҙҙоң өс сифаты?

– Илһөйәрлек, халыҡсанлыҡ, һәләт. 

– Уңыш – ул даланмы, әллә үҙ өҫтөңдә эшләүме?

– Барыһы ла тырышлыҡтан килә, даланһыҙ булыу ҙа мөмкин түгел.

– Тормошоғоҙҙа иң ғорурланған ғәмәлдәрегеҙ?

– Ғаиләм, туғандарым, эшем.

– Тәнҡиткә нисек ҡарайһығыҙ?

– Тәнҡитсеһенә ҡарап, ыңғай ҡабул итәм.

– Ҡуян йылында тыуған кеше булараҡ, йондоҙнамә һеҙгә тап киләме?

– Шул хәтлем тап килә, хатта ҡытайҙар мине ҡайҙан белгән икән, тип уйлап ҡуям!

– Яңы йылға ниндәй теләктәр, өмөттәр бағлайһығыҙ?

– Илебеҙ имен, донъялар тыныс булһа, барыһы ла яҡшы булыр, тип ышанам.

Рүзилә ИҪӘНБАЕВА.

Сығанаҡ:https://bashgazet.ru/articles/-bi-t-m-m-ni-t/2022-12-27/ytay-ar-mine-ay-an-belg-n-3088217