Ғәлиәхмәттә клуб буласаҡ!

Аҡъюл ауыл биләмәһе хакимиәтенән хәбәр итеүҙәренсә, әлеге ваҡытта Ғәлиәхмәт мәктәбе бинаһының бер өлөшөндә ремонт эштәре бара. Бында клуб учреждениеһы һәм ауыл китапханаһы булдырыла.
 
Клубта 50 урынлыҡ тамашалар һәм халыҡ йыйылыштары өсөн зал, китапхана, административ бүлмә, гардероб буласаҡ. Мәҙәниәт усағы яңы кәрәкле әйберҙәр һәм йыһаздар менән йыһазландырыласаҡ.

"Урындағы башланғыстарҙы хуплау" программаһы сиктәрендә, элекке мәҙәниәт йорто урынында урам сәхнәһе, тамашасылар өсөн эскәмйәләр ҡуйыла. Бынан тыш  балалар майҙансығы яңыртыласаҡ, волейбол һәм мини-футбол майҙансыҡтарын булдырыу планлаштырыла.