Яһалма зиһен буйынса үҙәк ойошторола

Башҡортостан Республикаһы Хөкүмәте төбәкте яһалма интеллект өлкәһендә һанлы трансформациялау буйынса саралар йыйынтығын раҫланы.

Ул Рәсәй төбәктәре араһында лидерлыҡҡа өлгәшеү  маҡсатын ҡуя. Төп ҡарар – Вуз-ара кампус нигеҙендә берҙәм Төбәк яһалма зиһен үҙәген булдырыу. Был Башҡортостан Хөкүмәте Премьер-министры Андрей Назаров етәкселегендәге ултырышта иғлан ителде.

Башҡортостан яһалма зиһен технологияларын тормошҡа ашырыуҙа тотороҡло үҫеш күрһәтте: 2025 йылдың апреленә ҡарата илдә 16-сы урынды биләй. 2030 йылға стратегик маҡсат – Рәсәйҙә тәүге ун төбәк иҫәбенә инеү. Юғары белем биреү системаһы һәм фәнни ойошмалар был маҡсатҡа ирешеүҙең төп драйверы булып тора. Быға өлгәшеү өсөн фәнни-технологик үҫеш менән идара итеүҙең яңы моделе тормошҡа ашырыласаҡ, унда республика квалификациялы клиент булараҡ сығыш яһаясаҡ.

Башҡортостандың Фән һәм юғары белем биреү буйынса дәүләт комитеты рәйесе урынбаҫары Илдус Шәйәхмәтов төбәк иҡтисадының төп тармаҡтарында яһалма зиһенде тормошҡа ашырыу һәм ҡулланыу буйынса республиканың кадрҙар ресурстарын үҫтереү һәм фәнни потенциалы тураһында ентекле һөйләне. Әле төбәктең алдынғы биш юғары уҡыу йорто йыл һайын һанлы иҡтисад өсөн 1 558 сығарылыш уҡыусыһын әҙерләй. 2023 йылдан алып фәнни һәм белем биреүҙең 38 яһалма зиһен технологияһы булдырылған, уларҙан 20-һе реаль секторҙа – сәнәғәттә, медицинала, ауыл хужалығында, социаль өлкәлә ғәмәлгә ашырылған да инде.

Диспаритетлы фәнни потенциалды нығытыуға айырым иғтибар бирелә. Бының өсөн вуз-ара кампустағы Төбәк яһалма интеллект үҙәге бизнес һәм дәүләт органдары клиенттары өсөн берҙәм интегратор һәм «мөмкинлектәр тәҙрәһе» булып хеҙмәт итәсәк. Үҙәк Евразия фәнни-белем биреү үҙәгендә ҡатнашҡан барлыҡ юғары уҡыу йорттарының һәм фәнни ойошмаларҙың тырышлығын берләштерәсәк.

Үҙәкте булдырыуҙы Фән һәм юғары белем биреү буйынса дәүләт комитеты Дәүләт идараһын һанлы үҫтереү министрлығы менән берлектә төҙөгән проект офисы көйләйәсәк. «Бер тәҙрә» принцибы һәм кампус инфраструктураһына инеү өсөн берҙәм ҡағиҙәләр сәнәғәттә, телемедицинала, агросәнәғәт комплексында һәм киберхәүефһеҙлектә һанлы үҙгәртеп ҡороу проблемаларын системалы хәл итеү мөмкинлеген бирер тип күҙаллана.  Премьер-министр Андрей Назаров  яһалма зиһен үҙәктәрен булдырыу буйынса федераль конкурста ҡатнашыу өсөн ғариза документтарын әҙерләргә ҡушты.

Белешмә: Өфө фән һәм технологиялар университеты һанлы иҡтисад рейтингында төбәк юғары уҡыу йорттары араһында 7-се урынды биләй.  

Республикала биш юғары уҡыу йорто һанлы иҡтисад өсөн белгестәр әҙерләй: Өфө фән һәм технологиялар университеты, Өфө дәүләт нефть техник университеты, Башҡортостан дәүләт медицина университеты, Башҡортостан дәүләт аграр университеты, Башҡортостан дәүләт педагогия университеты.

Фото: БР Хөкүмәте сайты.