Ырымбур башҡорттары балалар өсөн туған телде өйрәнеү курстарын асырға йыйына

Ырымбур башҡорттары балалар өсөн туған телде өйрәнеү курстарын асырға әҙерләнә. Был хаҡта «Башинформ» хәбәрсеһенә Орск ҡалаһынан VI Бөтә донъя башҡорттары ҡоролтайында ҡатнашыу өсөн килгән Линера Кәлимуллина һәм Әлиә Әбүзәрова һөйләне. Уларҙың һүҙҙәренсә, Ырымбур өлкәһе делегацияһында – Ырымбур, Орск, Ҡыуандыҡ, Новотроицк, Медногорск ҡалаларынан 18 вәкил.

«Беҙ башҡорт теле, эшҡыуарлыҡ һәм мәҙәниәте буйынса секцияларҙа ҡатнашырға йыйынабыҙ. Башҡорт теле секцияһында беҙ, тәү сиратта, үҙебеҙҙең Орск ҡалаһында балалар өсөн башҡорт теле курстары ойоштороу буйынса методик һәм башҡа төрлө ярҙам алырға өмөтләнәбеҙ. Бөгөн ҡалала 4 мең самаһы башҡорт йәшәй, күп балалар башҡорт телен, тарихын, мәҙәниәтен белмәй. Был башҡорт халҡының изге урыны – «Каруанһарай» комплексының тарихына ла ҡағыла. Беҙгә ошо етешһеҙлекте бөтөрөргә, ә иң мөһиме, балаларға ошо хаҡта һөйләргә, аңлатырға кәрәк. Үҙебеҙгә лә туған телдә күберәк аралашыу, тарихты һәм мәҙәниәтте өйрәнеү зарур», — тине Линера Кәлимуллина.

Әлиә Әбүзәрова сараның бик яҡшы ойошторолоуын билдәләне:

«Делегаттарҙы ҡаршы алыу, шул иҫәптән программа – барыһы ла юғары кимәлдә. Кисә кискеһен филармонияла беҙгә башҡорт милли йолаларын күрһәттеләр. Беҙ барыһын да беләбеҙ, әлбиттә, ләкин үҙебеҙ өсөн ниндәйҙер яңылыҡ та астыҡ».