Ветерандар менән осрашыу

Аҡъяр ауылы “Йәйғор” балалар баҡсаһында Тәрбиәселәр һәм балалар баҡсаһы хеҙмәткәрҙәре көнө айҡанлы тантаналы сара уҙҙы. Сараға районыбыҙҙың  төрлө ауылдарының мәктәпкәсә учреждениеларында етәксе, мөдир вазифаһын  башҡарған,  оҙаҡ йылдар балалар баҡсаһында эшләп хаҡлы ялға сыҡҡан ветерандар саҡырылды. Уларға балалар баҡсаһының  өлкән тәрбиәсеһе Зилә Рәүил ҡыҙы  баҡсабыҙ менән таныштырып экскурсия ойошторҙо. 

     Мәғариф өлкәһендә ҡайнап эшләгән ветерандарға баласаҡ иленә сәйәхәт: баҡсаның ихатаһы, төркөмдәре, матди – техник базаһы  менән танышыу  бик оҡшаны. Район мәғариф идаралығының начальнигы Айгөл Фәрит ҡыҙы Кәримова байрам  менән ҡотлап, изге теләктәрен еткерҙе, мәғариф идаралығының  мәктәпкәсә йәштәге балаларға белем һәм тәрбиә биреү буйынса методисы Рыскулова Ләйсән Басыр ҡыҙы район балалар баҡсаларының эштәре, уңыштары  менән таныштырҙы.

    Бер мәлгә баласаҡ иленә сумған ололар кескәйҙәрҙең йыр-бейеүҙәрен ихлас алҡышлап эшләгән дәүерҙәренә, йәшлек хәтирәләренә бирелделәр.  “Бәпембә” балалар баҡсаһында эшләп  хаҡлы ялға сыҡҡан 87 йәшлек  Түснәкова Файза Шәкир ҡыҙы  үҙҙәре эшләгән йылдар  хәтирәләре менән бүлешһә,   шулай уҡ 87- се  йәшен ҡаршы алыусы Вәлеева Клара Батыр ҡыҙы “Бәпембә” балалар баҡсаһының нигеҙенән алып төҙөлөп бөткәнсе Аҡъяр һәм Өфө юлдарын әллә нисә тапҡыр урап, баҡсаны төҙөп  бөтөп унда эшләүенә һәм баҡсаның әлеге  көндә лә уңышлы эшләп килеүенә ҡыуанысын белдерҙе.  “Тополек” балалар баҡсаһында эшләп  50 йыл хеҙмәт стажының 28 йылын балалар баҡсаһы мөдире вазифаһын башҡарған Карманова Мария Семеновна үҙенең ҡыҙҙарының да тәрбиәсе  һөнәрен һайлағандарына шатлығын белдерҙе. Малова Галина Васильевна һәм Никитина Анна Васильевна Бүребай ауылының “Ҡояшҡай” балалар баҡсаһынд а хөрмәт ҡаҙанған алдынғы тәрбиәселәр.  Һәр заманда ла тәрбиәсе иң абруйлы, иң хөрмәтле һөнәрҙәрҙең береһе булып ҡала. Үҙебеҙ ҙә тап ошо тармаҡты һайлағаныбыҙға бер ҡасан да үкенмәнек,  балалар менән эшләгән кешенең күңеле лә йәш, тормошо ла нурлы була, – тигән фекерҙә Мария Семеновна. “Бәпембә” балалар баҡсаһында  эшләп хаҡлы ялға сыҡҡан  Моталова Бикә Иҙрис ҡыҙы, мәғариф идаралығының  мәктәпкәсә йәштәге балаларға белем һәм тәрбиә биреү бүлеген етәкләгән Ҡаҙаҡҡолова Люция Айса ҡыҙы, Таштуғай ауылы балалар баҡсаһында эшләгән Латыпова Зөһрә Мөхәммәт ҡыҙы, Иҫәнгилде ауылы  “Ләйсән” балалар баҡсаһынан Иҫәнгилдина Лилиә Ғәйнелхаҡ ҡыҙы , Сиҙәм ауылы  “Гөлдәр” балалар баҡсаһынан Кәримова Рәйсә Таип ҡыҙы,  Степной ауылы  “Айгөл” балалар баҡсаһынан  Таһирова Зәйтүнә Әбделхаҡ ҡыҙы, Мәмбәт ауылы  “Ләйсән” балалар баҡсаһынан Зилә Рәхимйән ҡыҙы  мә­ғариф өлкә­һендә эшләүҙәренә, күпме йәш быуынға тәрбиә биреүҙәренә һәм уларҙың хәҙерге көн дә уңышлы  тормоштарына һөйөнөүҙәрен һөйләнеләр.  Район мәғариф идаралығының методик бүлек етәксеһе Рәмзиә Хөрмәт ҡыҙы Ильясова  осрашыуға килә алмаған Яңы Ергән ауылынан Рәхмәтова Рәмилә Рауил ҡыҙына, Һамар ауылынан Харрасова Мәрзиә Мәүлетдин ҡыҙына,  Тарасова Надежда Абрамовнаға, Байғусҡар ауылынан Баймурзина Сания Фәйзерәхмән ҡыҙына  һәм хеҙмәттәрен балалар баҡсалары коллективын етәкләүгә арнаған барлыҡ ветерандарға район мәғарифын үҫтереүҙә тос өлөш индереүҙәре, йәш быуынға өлгө булыуҙары, фиҙаҡәр хеҙмәттәре өсөн рәхмәт белдерҙе.

  Төрлө йылдарҙа эшләп, бер үк вазифаны башҡарған, бер үк маҡсат менән янған ветеран-педагогтарҙың   һөйләшеп һүҙҙәре бөтмәне, үҙҙәренең эш дәүерендә булған уңыштары, иҫтә ҡалған ҡыҙыҡлы хәл -ваҡиғалары тураһында һөйләнеләр, йәш быуынға теләктәрен дә еткерҙеләр. Осрашыу йылы, ихлас мөхиттә тамамланды.

     Йәмилә Хәйбуллина,

“Йәйғор” балалар баҡсаһының өҫтәмә белем биреү педагогы.