Хеҙмәтегеҙ өсөн ҙур рәхмәт

Хәйбулла районының мәғариф хеҙмәткәрҙәре август кәңәшмәһенә йыйылып, уҙған уҡыу йылына йомғаҡ яһаны һәм яңы уҡыу йылына эш итеү стратегияһын билдәләне, бурыстар ҡуйҙы. 3-сө Аҡъяр мәктәбендә уҙған сарала  мәктәптәр һәм балалар баҡсалары етәкселәре, уҡытыусылар, тәрбиәселәр һәм педагогик хеҙмәт ветерандары ҡатнашты.   

Кәңәшмә  бүләкләү тантанаһы менән тамамланды. Мәғарифты үҫтереүгә лайыҡлы өлөш индергәне, профсоюз эшендә әүҙем ҡатнашҡаны өсөн Мәғариф хеҙмәткәрҙәре профсоюзының республика комитеты почет грамотаһы менән Әбүбәкер ауылы «Сулпылар» тәрбиәсеһе Әминә Сынбулатова һәм Аҡъяр ауылы «Шатлыҡ» балалар баҡсаһы педагог-психологы Әлфиә Солтанова бүләкләнде. 

Күп йыллыҡ намыҫлы хеҙмәте, эшендә юғары профессионализмы өсөн Атингән мәктәбе ашнаҡсыһы Гөлфиә Хәмәҙиеваға Башҡортостан Республикаһы сауҙа Һәм хеҙмәттәр министрлығының почет грамотаһы тапшырылды. Ә Подольск ауылы мәктәбе ашнаҡсыһы Светлана Аҡсурина  Башҡортостан Сауҙа Һәм хеҙмәттәр министрлығының рәхмәт хаты менән бүләкләнде. Ҡотлайбыҙ!