Өйгә эш биреүҙәр бөтөрмө икән ни?

Мәктәп уҡыусылары һәм уҡытыусыларға көсөргәнеште кәметеү өсөн балаларға өй эше бирмәҫкә кәрәк. «Яңы кешеләр» фракцияһынан Дәүләт Думаһы вице-спикеры Владислав Даванков шулай тип белдерҙе. Был хаҡта РИА Новости агентлығы еткерә.

«Минең улым депутат булыуымды белеүгә үк өй эшен ғәмәлдән сығара торған закон ҡабул итеүҙе һораны. Бөгөн Мәскәү ата-әсәләре менән осрашыуҙа  мин быға  ваҡыт етеүен аңланым. Был – донъя күләмендәге тәжрибә. Балалар һәм уҡытыусыларға көсөргәнеште  кәметеү барыһына ла файҙаға ғына буласаҡ», — тип иҫкәртте парламентарий.

Даванков яҡын арала был мәсьәлә хаҡында Мәскәүҙең Мәғариф һәм фән департаменты менән фекер алышырға вәғәҙә итә.