Йөрәк һүҙҙәре – уҡытыусылар хаҡында!

Уҡытыусы!
Ниндәй гүзәл исем!
Кеше итеп һине әҙерләй.
Тормоштоң ул көрәшсеһе итә,
Ҡурсалай, һөйә, ҡәҙерләй!

2023 йыл Рәсәй Президенты Владимир Путин Указы менән Уҡытыусы һәм остаз йылы тип иғлан ителде. Уның сиктәрендә уҙғарылған саралар педагог һөнәренең абруйын күтәреүгә йүнәлтелгән.

Юлбарыҫ ауылында Уҡытыусы һәм остаз йылы сиктәрендә, Башҡортостан Республикаһында Йәнтөйәк өсөн файҙалы эштәр йылын асыу сиктәрендә   «Уҡытыусылар Рәсәйҙе данлай, уҡыусылар уға дан килтерә!» осрашыуы үтте. Сарала ҡатнашыусыларҙың ҡайһы берәүҙәре өсөн мәктәп оҙаҡ йылдар хеҙмәт итеү урынына әүерелә, икенселәре яратҡан уҡытыусыларын иҫенә төшөрҙө.

Сараның ҡунаҡтары - педагогик хеҙмәт ветерандары Сания Мөхәмәт ҡыҙы Рыҫҡолова, Рәйлә Ҡасим ҡыҙы Байғужина, Миңлегөл Яхъя ҡыҙы Байғужина, Лилиә Мирғәле ҡыҙы Таймасова һәм мәктәбебеҙҙең төрлө йылдарҙағы элекке сығарылыш уҡыусылары: Күскилдина (Байғужина) Динә Фазыл ҡыҙы, Торомтаева (Байғужина) Гөлшат Сәлимйән ҡыҙы, Байғужина Зөлфиә Мырҙабай ҡыҙы, Байғабулова (Байғужина) Бүләкбикә Ишмырҙа ҡыҙы һәм Таҡалова (Байғужина) Лира Хәлит ҡыҙы. Ветеран-педагогтар әле хаҡлы ялда, әммә уҡыусылары хәтерендә улар ҡайһы берҙә ҡәтғи һәм талапсан, ҡайһы берҙә күңелле һәм ярҙам итергә әҙер булыуҙары менән мәңгелеккә хәтерҙә ҡалған. Педагогик хеҙмәт ветерандары хеҙмәт юлы тураһында, эшләгән осорҙа булған ҡыҙыҡлы хәл-ваҡиғалары тураһында һөйләне.

Мәктәпте тамамлаусы ҡунаҡтар мәктәп йылдары тураһында иң сағыу тәьҫораттары менән уртаҡлашты. Һәр уҡытыусы үҙенең тормош юлы хаҡында һөйләне, остаз-уҡытыусыларын йылы һүҙҙәр менән иҫкә алды. Был сараға «Инештән алып беҙҙең көндәргә тиклем» фотокүргәҙмәһе ойошторолғайны. Был үҙенсәлекле фотойылъяҙмала уҡытыусыларҙың, мәктәп сығарылыштарының фотолары ҡуйылған. Уларҙың портреттары үҫмер саҡта экранда күрһәтелгән яратҡан уҡытыусылары тураһында хикәйәләре моңһоу һәм йәнле яңғыраны. Кисә матур концерт номерҙары менән оҙатылып барҙы.