"Бергәләп тапшырабыҙ. Ата-әсәләрҙең Берҙәм дәүләт имтиханын тапшырыу көнө" бөтә Рәсәй акцияһы сиктәрендә 2-се Аҡъяр мәктәбендә 11-се класс уҡыусыларының ата-әсәләре БДИ тапшырыу ҡағиҙәләре һәм процедуралары менән танышты.
Рус теле буйынса берҙәм дәүләт имтиханында 30-ҙан ашыу ата-әсә һәм район хакимиәте вәкилдәре булды. Имтихан барышында өлкәндәр уның бөтә процедуралары аша үтте: теркәлеү, телефондарын һәм шәхси әйберҙәрен тапшырҙы, имтихан алды контролен үтте, бланктар тултырҙы. Рус теленән имтихан ике өлөштән торҙо. Беренсеһендә 7 задание булһа, икенсе өлөшөндә йөкмәткеле яуап талап ителде. Ата-әсәләр был заданиеларҙы бер сәғәт эсендә үтәргә тейеш булды.
Акция сығарылыш уҡыусыларына һәм уларҙың ата-әсәләренә БДИ-ға әҙерлек менән бәйле артыҡ психологик көсөргәнеште бөтөрөргә ярҙам итеүгә, имтихан процедураһы менән яҡшыраҡ таныштырыуға йүнәлтелгән.
Сара ата-әсәләр йыйылышы менән тамамланды.