Эх, күңелле каникул!

1-се һанлы Аҡъяр мәктәбендә «Алға»  исемле уҡыу күнекмәләре йыйыны икенсе йыл рәттән Хәсәнова Гөлнәзирә Миннулла ҡыҙы, Исҡужина Дилбәр Абрар ҡыҙы етәкселегендә эш башланы. Барлығы 7 вожатый, 12 магистр йәлеп ителгән. Әле унда төрлө конкурстарҙа, олимпиадаларҙа еңеү яулаған, мәктәп тормошонда әүҙем ҡатнашҡан 60  бала ял итә.

Биология, химия, математика, физика, йәмғиәтте өйрәнеү, инглиз теле, география фәндәре буйынса бөтә Рәсәй олимпиадаларына әҙерлек бара. Был предметтарҙы тәрәндән өйрәнеү өсөн Өфө ҡалаһының инженер лицейынан химия фәне кандидаты Ғүмәров Айнур Мансур улы, балаларға өҫтәлмә белем биреү үҙәгенән доцент Йомағолова Гөлдәр Рәшит ҡыҙы  биология фәненән уҡыта, БДПУ-нан Уткин Сергей Павлович географияны өйрәтә.

Шулай уҡ район мәғариф бүлеге идараһынан Ирназарова Зилә Салауат ҡыҙы математиканы алып барһа, 1-се һанлы Аҡъяр мәктәбенең тәжрибәле, алдынғы уҡытыусылары Таҡалова Әлфиә Мирсәйет ҡыҙы физиканан, Баймырҙин Шәһит Мәжит улы,Хәсәнова Гөлнәзирә Миңнулла ҡыҙы йәмғиәтте өйрәнеү, Юлдашбаева Рима Риф ҡыҙы инглиз теленән уҡыта. Шулай уҡ Степной  мәктәбенән Йәтимова Вәсилә Надир ҡыҙы биологиянан , Булатов Рәил Сәлимйән улы география фәнен төшөндөрә. Аслаева Зәйтүнә  Ҡорман  ҡыҙы «Алға»  йыйынының гимнын өйрәтһә, Толобаева Физәлиә Венер ҡыҙы  күңелле бейеүҙәре  менән  балаларҙың күңеленә дәрт өҫтәй.

Һәр бер көн функциональ грамотлылыҡтың 6 йүнәлеше буйынса төрлө конкурстар ҡаралған. 28 март тантаналы асыу менән башланды ла «Креатив фекерләү» темаһы аҫтында дауам итә.

«Алға»  лагерының махсус хәбәрселәре: Г.И. Ишбулатова һәм А.Х. Шәйехмырҙина.