Ире йоҡлағанда, ҡыҙын быуып үлтергән

Уҙған аҙнала Благовещен ҡалаһында булған фажиғә күптәрҙе тетрәндерҙе: 27 йәшлек әсәй кеше алты айлыҡ ҡына балаһын быуып үлтерҙе. Аннаның (исеме үҙгәртеп алынды) таныштары һәм күршеләре шок хәлендә, сөнки улар уны иғтибарлы һәм нескә күңелле әсәй тип белгән. Ысынбарлыҡта нимә булған һуң? Был турала “КП-Өфө” баҫмаһы яҙа.

Был хәл 18 февралдә булды. Бәпес оҙаҡ итеп һәм ҡысҡырып илаған, уны тынысландыра алмаған әсәй кеше ҡыҙып киткән һәм уны быуған. Анығыраҡ әйткәндә, ныҡ итеп ҡулы менән ҡыҙҙы ҡыҫҡан. Был ваҡытта Аннаның ире һәм өлкән улы шул уҡ бүлмәлә булған һәм күрше карауатта йоҡлаған. Улар баланың илауын да, аҙаҡ үлгәс, тынып ҡалыуын да ишетмәгән.

Анна иһә был ҡылығынан һуң тыныс ҡына ятып йоҡлаған. Иртән уянғас, ҡыҙының үле кәүҙәһен күреп, әсәһенә шылтыратып был хәл тураһында һөйләй. Өләсәй кеше ашығыс ярҙам һәм полиция саҡырта. Тәфтишсегә Анна үҙенең ҡылығын бала тапҡандан һуң барлыҡҡа килгән депрессия тип аңлата һәм ныҡ арыным ти. Бәпес ваҡытынан алда тыуған һәм һаулығы менән проблемалары булған. Тик барыбер уға ҡарата енәйәт эше ҡуҙғатҡандар.

Шуныһы аптырата, күршеләре Аннаны һәр ваҡыт тыныс, тәрбиәле ҡатын итеп күргән. Ул мәктәптә тик “бишле”гә уҡыған, өлкән балалары һәр саҡ ҡараулы булған, тыныс шарттарҙа үҫкән.

Ғаилә башлығы Николай эшләгән, ә Анна өйҙә балалар ҡараған. Улына – өс, ҡыҙына ике йәш тулған. Социаль селтәрҙәрҙе ҡараһаң, улар бәхетле ғаилә кеүек күренә.

Ә бына “КП-Өфө” баҫмаһының сығанағы ғаиләнең проблемалары булыуын әйткән. Баҡһаң, Анна наркотик таратҡан өсөн хөкөм ителгән булған, ә ире рәсми рәүештә эшләмәгән. Ә иң ҡурҡынысы - туҡмау эҙҙәре ҙур балаларҙа ла булған. Күрәһең, әсәһе ҡыҙғанда, уларға ла эләккәндер.

Әлеге ваҡытта тикшереү бара, ҡатын тәфтиш изоляторында. Тәфтишселәр уның ниндәй хәлдә бындай ҡурҡыныс енәйәткә барыуын асыҡларға тырыша. Бәлки, ысынлап та, ул аффект хәлендә булғандыр...

Фото: КП-Өфө.