Балаларҙың күҙ алдында боҙ аҫтына киткән

12 декабрҙә көндөҙ мәктәптән ҡайтҡан өс уҡыусы фажиғәнең шаһиты булған. Ауырғазы районының Ҡорманай ауылы янында, Ауырғазы йылғаһында, улар ҡысҡырған тауышты ишетеп, алыҫтан һыуҙа бер ирҙе күрә. Балалар урынға килеп еткәнсе, ир һыу аҫтына киткән була.

Яҡынса мәғлүмәттәр буйынса, ир биҙрәләр менән һыу алып ҡайтам тип йылғаға киткән. Ҡыҙғанысҡа ҡаршы, ул кире әйләнеп ҡайтмай – боҙ аҫтына киткән.

13 декабрҙә Башҡортостандың Ғәҙәттән тыш хәлдәр буйынса дәүләт комитеты водолаздары һәләк булған ирҙең кәүҙәһен тапҡан.

Хөрмәтле дуҫтар, быйыл көндәр йылы тороу сәбәпле боҙ ышанысһыҙ, шуға күрә лә һаҡ булығыҙ.

Фото: Башҡортостандың Ғәҙәттән тыш хәлдәр буйынса дәүләт комитетынан.