17 йәшлек егет сәй эсәм тип бәләгә тарыған...

Башҡортостанда 17 йәшлек егет 1-2-3 дәрәжә тән йәрәхәттәре алған. Уның башы, муйыны, кәүҙәһе, аяҡтары һәм ҡулдары, шулай уҡ тын юлдары зыян күрә.

Рәсәй Ғәҙәттән тыш хәлдәр министрлығы тәфтишселәре асыҡлауынса, Ҡырмыҫҡалы районының Подлуб ауылында егет урамдан йылы бинаға 50 литрлыҡ пропан баллонын алып инә һәм уны газ плитаһына үҙе тоташтыра. Һуңыраҡ зыян күреүсе сәйнүкте плитаға ҡуйырға ҡарар итә һәм тәмәке тарта, шунан һуң көслө шартлау була. Баллонды герметикһыҙландырыу һөҙөмтәһендә металл вагон бинаһы яна.

Янғын һүндереү хеҙмәтенең ярҙамы кәрәк булмай. Зыян күреүсе Өфөнөң 18-се ҡала дауаханаһының реанимация бүлегенә оҙатыла.

Рәсәй Ғәҙәттән тыш хәлдәр министрлығының Башҡортостан буйынса баш идаралығынан хәбәр итеүҙәренсә, газ баллондарын махсус урындарҙа ғына дөйөм күләмдең 85 процентынан артыҡ тултырырға ярамай. Шлангтарҙың герметиклығын тоташыу урындарында ла һаҡлау мөһим. Баллонды һыуыҡтан йылылыҡҡа индерергә ярамай.

фото:Рәсәй Ғәҙәттән тыш хәлдәр министрлығының Башҡортостан буйынса баш идаралығы