Башҡортостанда ҙур йөк машинаһы менән бәрелешкән ВАЗ-2114 водителе һәм уның пассажиры йән биргән. Башҡортостан Республикаһы буйынса ЮХХДИ хәбәр итеүенсә, авария кисә көндөҙ Краснокама районында булған. «ВАЗ-2114» менән ҡаршыға килгән «МАЗ» йөк машинаһы бәрелешкән.
«Фажиғәлә еңел автомобилдең 33 йәшлек пассажиры ашығыс медицина ярҙамы килеп еткәнсе яҡты донъя менән хушлашҡан. ВАЗ-дың 21 йәшлек водителе дауаханаға оҙатылған, һуңынан Нефтекама дауаханаһының реанимация бүлегендә йән биргән. Ваҡиға шаһиттары әйтеүенсә, йәш водитель уҙып китеү өсөн ҡаршы һыҙатҡа сыҡҡан. Тикшереү башланған», — тип хәбәр иттеләр ведомствонан.
Уҙған тәүлектә республика юлдарында бөтәһе ете автомобиль аварияһы теркәлгән, ике кешенең ғүмере өҙөлгән, етәүһе йәрәхәтләнгән.
Башинформ.