Үҙ фатирында һәләк булған ЮХХДИ инспекторын һәм уның ҡатынын һуңғы юлға оҙаттылар

Башҡортостанда Рәсәй Эске эштәр министрлығының Күмертау ҡалаһы буйынса бүлеге биләмәһендә 20 апрелдә  туғандары, хеҙмәттәштәре һәм дуҫтары һәләк булған йәш пар - Максим һәм Алена Боковтар менән бәхилләште.

2022 йылдың 19 апрелендә Күмертауҙа биш ҡатлы күп фатирлы йорттоң фатирында 33 йәшлек ирҙең һәм уның 30 йәшлек ҡатынының мәйете табылған. Уларҙың һөрөм еҫе менән ағыуланыу билдәләре булған.

Асыҡланыуынса, юл хәрәкәте хәүефһеҙлеге дәүләт инспекторы полиция капитаны Максим Боков һәм уның ҡатыны Алёна һәләк булған. Йәштәр яңыраҡ, бер йыл самаһы элек өйләнешкән. Билдәле булыуынса, йортта үле хайуандар ҙа табылған. Башҡортостан буйынса Эске эштәр министрлығы мәғлүмәттәре буйынса, полицейский иртән эшкә сығырға тейеш булған, ләкин билдәләнгән ваҡытта килмәгән. Борсолоу белдергән коллегалары уның өйөнә килгән, ләкин бер кем дә ишекте асмаған, телефон шылтыратыуҙарына яуап бирмәгән. Ишекте емереп асырға ҡарар ителә, ә эстә үле фатир хужалары табылған.

фото: Башинформ.