Иғтибар: бешмә сире!

Һуңғы ваҡытта Башҡортостанда, хатта Урал аръяғы райондарында эпизоотик хәл-торош көсөргәнешле.

Баймаҡ районында малсылыҡҡа афәт килтергән  нодуляр дерматит сире, ҡайһы бер райондарҙа ҡош киҙеүе сығанаҡтары һәр беребеҙҙе көсөргәнештә тотто. Хәҙер иһә күрше Ырымбур өлкәһендә бешмә (ящур) сире асыҡланған.

Хәйбулла районы территорияһына мал һәм кеше өсөн дә хәүефле булған ошо инфекцияның үтеп инеүенә һәм таралыуына юл ҡуймау сараларын күреү, ғәҙәттән тыш хәл осрағына уны бөтөрөү өсөн әҙерлек һыҙығында булыу маҡсатында ғәҙәттән тыш ведомство-ара комиссия ултырышы үтте. Уны муниципаль район хакимиәте башлығы вазифаһын башҡарыусы Рөстәм Шәрипов алып барҙы. Унда Башҡортостан ветеринария идаралығы начальнигы Азат Йыһаншин, Башҡортостанда эпизоотик хәл-торошҡа ҡаршы сараларҙы ойоштороу һәм контролләү бүлеге начальнигы Руслан Байкеев, Башҡортостан буйынса Россельхознадзор  идаралығы начальнигны урынбаҫары Ришат Ҡотләмәтов, Хәйбулла район ветеринария станцияһы начальнигы Ишмырҙа Баймырҙин, район хакимиәте башлығының ауыл хужалығы буйынса урынбаҫары Вил Рәхмәтов, ауыл хужалығы биләмәләре башлыҡтары, крәҫтиән-фермер хужалыҡтары етәкселәре, ауыл старосталары ҡатнашты.

Ғәҙәттән тыш ведомство-ара комиссия ултырышында түбәндәге ҡарар ҡабул ителде: Ырымбур өлкәһендәге малдар бешмәһенең  таралыу ихтималлығына бәйле,  ауыл биләмәләре башлыҡтарына, милек формаһына ҡарамаҫтан, барлыҡ мал-тыуар  хужаларына, малсылыҡ продукциялары менән тәьмин итеүселәргә Хәйбулла районында  зпизоотик хәл-торошто  контролләүҙе көсәйтеү бурысы ҡуйылды. Был саралар бешмә ауырыуы сығанаҡтарын бөтөрөү һәм  таралыуына юл ҡуймау нигеҙендә иҫкәртеү, диагностикалау, сикләү, карантин һәм башҡа сараларҙы күреүгә нигеҙләнгән Рәсәй ауыл хужалығы министрлығы бойороҡтарына ярашлы, бешмәгә ҡаршы көрәш буйынса ветеринар ҡағиҙәләрҙе үтәүҙе тәьмин итеү нигеҙендә башҡарыла.

1.Район территорияһында һәр бер баш эре малдарҙы индентификациялау һәм  биркалау;

2. шәхси ихаталарҙа мал-тыуар эйәләренә һәм хужалыҡ субъекттары етәкселәренә, милек формаһына ҡарамаҫтан, биологик хәүефһеҙлекте тәьмин итеүҙе контролләүҙе көсәйтергә, бигерәк тә һөт-тауар фермаларында инфекция ауырыуҙарын иҫкәртеү маҡсатында малдарҙы репелленттар менән даими рәүештә эшкәртергә;
3. малдарға бешмәгә һәм башҡа хәүефле сирҙәргә ҡаршы профилактик вакциянация үткәрергә;
4. дезинфекция барьерҙарының тәүлек әйләнәһенә эшләүен тәьмин итергә. Хужалыҡтарҙа сит кешеләр булыуы, малдарҙы яңынан төркөмләү, һуғарыуға сығарыу һәм ферма территорияһында йөрөтөү тыйыла;
5. дәүләт ветеринария хеҙмәте менән килешмәйенсә, Ырымбур һәм башҡа өлкәләрҙән, Башҡортостан райондарынан мал аҙығы килтереү тыйыла;
6. бешмәгә хас булған клиник билдәләрҙе ваҡытында асыҡлау маҡсатында ведомстволы территорияла булған эре малдарға даими тикшереү үткәрергә;
7. үҙ ихаталарында ауыл хужалығы малдары аҫраған һәр граждан ошо сирҙе иҫкәртеү маҡсатында иғтибарлы булырға һәм түбәндәге ҡағиҙәләрҙе үтәргә тейеш:

--тейешле документтары булмайынса, ситтән мал алмаҫҡа;

--мал һатып алған, һуйған һәм һатҡан осраҡта, быҙаулағанда был турала дәүләт ветеринария хеҙмәтенә хәбәр итергә;

--ветеринар белгестәргә малдарға диагностик тикшереү үткәреү һәм  вакцинация эшләү өсөн ҡаршылыҡ күрһәтмәҫкә;

--мал үлгән йәки бер нисә баш бер юлы сирләп киткән осраҡта был турала ветеринар белгестәрҙе иҫкәртергә кәрәк.

8. халыҡ, һунарсылар һәм милек формаһына ҡарамаҫтан, барлыҡ хужалыҡтар араһында, киң мәғлүмәт сараларын йәлеп итеп, аңлатыу эше алып барыу, йоғошло мал сирҙәре һәм ошо хәүеф сығанаҡтары, мал һәм ҡош-ҡортто аҫрау ҡағиҙәләрен аңлатыу, йылылыҡ эшкәртеүе үтмәгән мал аҙығын файҙаланыу ярамағанлығы тураһында мәғлүмәт еткереү.

Тулы материалды "Хәйбулла хәбәрҙәре" район гәзитенең 2-се һанында уҡығыҙ.