Хәйбулла районында иҫерек водитель аварияға сәбәпсе булған

2021 йылдың 17 декабрендә Хәйбулла районы Һамар ауылы янында 2 юл-транспорт ваҡиғаһы теркәлгән.

Төнгө сәғәт 1 тирәһендә Хәйбулла районында йәшәгән 28 йәшлек ир ВАЗ-2114 автомобиле менән идара итеү һәләтен юғалтып, юл ситенең һул яғына сығып осҡан, артабан әйләнгән. Иҫерек булыу-булмауын тикшергән саҡта ирҙең иҫерек булыуы асыҡланған. Водителгә ҡарата төрлө статьялар буйынса протокол төҙөлгән. Иҫерек водителдәр үҙҙәренең генә түгел, башҡаларҙың да ғүмерен хәүеф аҫтына ҡуя, аварияларға юл аса. 

Киске сәғәт 6-лар тирәһендә Һамар ауылы янында Хәйбулла районында йәшәүсе 35 йәшлек ир, "Лада Ларгус" менән идара итеү һәләтен юғалтып, юлдан ситкә сығып киткән. Транспорт водителе юл-транспорт ваҡиғаһы урынын ҡалдырған. Һуңынан автомобиль водителе асыҡланған. Водителгә ҡарата административ протокол төҙөлгән. Водителдәргә юл-транспорт ваҡиғаһы урынын ҡалдырып киткән өсөн 1 йылдан 1,5 йылға тиклем идара итеү таныҡлығынан мәхрүм ителеү, 15 тәүлеккә тиклем административ ҡулға алыу янауын онотмағыҙ, тип иҫкәртә ЮХХДИ-ның Хәйбулла районы бүлеге.

Юл хәрәкәте ҡағиҙәләрен теүәл үтәйек, һаҡ һәм яуаплы булайыҡ.

фото:ЮХХДИ.