Коляскала сабый һәләк булған

Иглин районы ауылдарының береһендәге ғаилә өсөн кисә ҙур фажиғә булған. Уларҙың 10 айлыҡ сабыйы коляскала үлгән. Был турала “Башинформ” мәғлүмәт агентлығы хәбәр итә.

Яҡынса мәғлүмәттәр буйынса, ата-әсәләре өй эштәре менән булған саҡта бәпес коляскала ултырған. Ниндәйҙер бер мәлдә, күрәһең, ул унан сығырға булған. Әммә ҡайыштарҙа буталған һәм вафат булған. Ата-әсәләре “ашығыс ярҙам” саҡыртып ҡараған, әммә табиптар бер нимә лә эшләп өлгөрмәгән: улар килгәнсе сабый йән биргән.

Ғаиләнең иҫәптә тормауы билдәле. Шулай уҡ тағы бер балалары бар.

Тәфтиш комитетында хәбәр итеүҙәренсә, Иглин районы тәфтишселәре баланың үлеме сәбәптәрен асыҡлау менән була. Суд-медицина экспертизаһы үткәрелгәс, баланың нилектән үлгәне аныҡ билдәле буласаҡ.

Фото: ncrim.ru