Алыҫ юлға сыҡмай тороғоҙ!

Башҡортостан Республикаһында әлеге ваҡытта һауа шарттарының боҙолоуы - температура режимының үҙгәреүе һәм яуым-төшөмдөң көсәйеүе күҙәтелә. Епшек ҡар, киҫкен ел, буран, күреү мөмкинлеге насарая. Юлдарҙа урыны менән ҡар һырынтылары һәм боҙлауыҡ.

20 февралдә кискеһен Һамар - Өфө - Силәбе автомобиль юлының 1355-се саҡрымында бер саҡрым дауамында 10 автомобиль ҡатнашлығында дүрт юл-транспорт ваҡиғаһы теркәлгән. Башҡортостан Республикаһы буйынса ЮХХДИ-ның матбуғат хеҙмәте мәғлүмәте буйынса, аварияларҙа бер кем дә зыян күрмәгән, ләкин транспорт саралары механик йәрәхәтләнгән. 

Ә Иглин районында киске сәғәт 9 тирәһендә йөк машинаһы менән еңел автомобиль төкөшкән. «Юл-транспорт ваҡиғаһында ике пассажир алған йәрәхәттәренән һәләк булған. Водитель дауаханаға оҙатылған. Ваҡиға урынында ЮХХДИ хеҙмәткәрҙәре һәм башҡа хеҙмәттәр эшләй. Ваҡиға сәбәптәре асыҡлана», - тип хәбәр иттеләр ЮХХДИ хеҙмәткәрҙәре.

Республиканың Дәүләт автоинспекцияһы водителдәргә тораҡ пункттар сиктәрендә шәхси автомобилдәрҙә юлға сығыуҙан тыйылып торорға һәм йәмәғәт транспорты менән файҙаланырға, ә алыҫ юлға, айырыуса төнгө ваҡытта, сығыуҙан тыйылып торорға кәңәш итә. Юлдағы хәлдәрҙе һәм юлдағы аныҡ хәлде иҫәпкә алып, хәрәкәт тиҙлеген һайлағыҙ. Дистанцияны һәм юл буйындағы арауыҡты һаҡлағыҙ. Уйланылмаған маневрҙар яһатмағыҙ һәм уҙып китеүҙән баш тартығыҙ. Киҫелештәрҙә һәм йәйәүлеләр үткәүелендә айырыуса иғтибарлы булығыҙ.

Йәйәүлеләргә юл аша сыҡҡанда айырыуса иғтибарлы булырға, ә ҡараңғы ваҡытта үҙҙәрен мотлаҡ яҡтылыҡты кире ҡайтарыусы элементтар тәьмин итергә кәрәк. Юлдарҙа ҡатмарлы хәл килеп тыуған осраҡта юл хәрәкәтендә ҡатнашыусылар тәүлек әйләнәһенә Дәүләт автоинспекцияһы бүлексәләренә ярҙам һорап мөрәжәғәт итә ала. Хеҙмәткәрҙәр мөмкин тиклем ярҙам күрһәтергә тырышасаҡ, кәрәк булғанда техник хеҙмәт йәки эвакуатор саҡыртырға ярҙам итәсәк.