10 йәшлек ҡыҙын бикләп тотҡан

Мәктәп, дуҫтар һәм дәрестәр нимә икәнен 10 йәшлек Таңһылыу (исеме үҙгәртелгән) онотҡан. Ҡыҙҙың элекке класташтары 4-се класта белем ала, ә ул үҙе әле лә 1-се класта уҡый тип иҫәпләнә. Асыҡланыуынса, баланың мәнфәғәттәрен боҙоп һәм асоциаль тормош алып барып, Таңһылыуҙың әсәһе уға белем бирергә ашыҡмай. Ҡатын эшләмәй, баланы ҡарамай, йортта антисанитария хөкөм иткән, тәҙрәләрҙә ҡуйы ҡара туҡыма, ҡыҙға урамда йөрөү тыйыла. Күршеләрҙең береһе лә ҡыҙҙың барлығын белмәй, уны бер кем дә күрмәй.

«Суд әсәгә баланы тәрбиәгә атаһына бирергә ҡуша, сөнки күп йылдар дауамында әсә ҡыҙға уның менән аралашыуҙы тыйған була. Суд ҡарарын үтәүҙән ҡасып, ул ҡыҙҙы йәшереп, бер нисә тапҡыр йәшәү урынын алмаштыра. Әсә менән ҡыҙҙы башҡарма эҙләүгә иғлан иттеләр», — тип һөйләнеләр Рәсәй федераль суд приставтары хеҙмәтенең Башҡортостан буйынса баш идаралығының матбуғат хеҙмәтендә.

Ҡатын-ҡыҙ барыһынан да ныҡ йәшеренгән. Банк картаһын ҡулланмай, ишекте бер кемгә лә асмай, баланы өйҙән сығармаған. Әммә Стәрлетамаҡтың суд приставтары махсус эҙләү бүлеге менән берлектә әсәнең һәм уның ҡыҙының ҡайҙалығын асыҡлаған. Ҡатын суд ҡарарын үтәүгә ҡамасауларға тырыша. Ҡурҡып ҡалған баланы социаль хеҙмәттәр хеҙмәткәрҙәренә тапшыралар, ә әсәһенә ике протокол төҙөйҙәр.

Таңһылыуҙы ваҡытлыса «Ғаилә» үҙәгенә урынлаштыралар. Хәҙер ҡыҙ менән белгестәр эшләй. Мәскәүҙә йәшәгән атаһы ҡыҙын килеп алырға сыҡҡан.

фото:РӘСӘЙ ФЕДЕРАЛЬ СУД ПРИСТАВТАРЫ ХЕҘМӘТЕНЕҢ БАШҠОРТОСТАН РЕСПУБЛИКАҺЫ БУЙЫНСА БАШ ИДАРАЛЫҒЫ