Күрше районда законһыҙ рәүештә алтын сығарыу буйынса эшмәкәрлек туҡтатылған

Башҡортостан Республикаһы Тәбиғәтте файҙаланыу һәм экология министрлығының Сибай территориаль комитеты инспекторҙары тарафынан Баймаҡ районы Күсей ауылынан 2 саҡрым көнсығыштараҡ ҡиммәтле металдарҙы (алтын) законһыҙ сығарыу факты асыҡланған.

Законһыҙ рәүештә алтын сығарылған ер участкаһын тикшереү барышында ведомство инспекторҙары ике «Лада Гранта» автомобилен тапҡан. Һыу ятҡылығы янындағы ҡулдан яһалған мини-драга янында ике ир эшләгән, өсөнсөһө  махсус ҡоролма ярҙамына йылға буйында алтын йыуған. Хоҡуҡ боҙоусыларҙың береһе аңлатма биреүҙән баш тартҡан, башҡаларҙың һүҙҙәренә ҡарағанда, уларҙың был участкала 1 майҙан алтын йыуыу менән шөғөлләнеүе билдәле булған. Хоҡуҡ боҙоусыларҙың ошо эшмәкәрлек төрөнә рөхсәттәре булмаған. «Башинформ»ға билдәле булыуынса, материалдар ғәйеплеләрҙең ҡануниәтте боҙоу осрағы буйынса енәйәт яуаплылығы билдәләре булыу-булмауын баһалау өсөн хоҡуҡ һаҡлау органдарына тапшырыла.

фото:«Башинформ»