Хәйбулла ирекмәндәре «Йәмиғ» мәсетендә ифтар үткәрҙе

Аҡъяр ауылының «Йәмиғ» мәсетендә уҙған ифтарға 100-ҙән ашыу кеше йыйылды. Ауыҙ астырыуға МХО ветерандары ла саҡырылды.  

Волонтерҙар хәрәкәте активистары район халҡы менән берлектә ҡунаҡтар өсөн матур табын әҙерләгән.

«Был сара яугирҙарҙың ҡатындары, әсәләре, атайҙары, туғандары бергә йыйылып, МХО-ла ҡатнашҡан ир-егеттәрҙең именлеге, тыныс күк йөҙө, тыныс тормош өсөн бергәләп доға ҡылһын өсөн ойошторолдо. Улар яңғыҙ түгеллеген иҫтә тотор өсөн дә был бик мөһим. Беҙҙең хәрәкәт, башҡа ирекмәндәр төркөмдәре кеүек үк, МХО-ла ҡатнашыусылар өсөн гуманитар ярҙам йыйыу буйынса әүҙем эшмәкәрлек алып бара. Район халҡы бик ҙур ярҙам күрһәтә, бер кем дә яугирҙарҙың заявкалары буйынса акцияларҙан, сараларҙан ситтә ҡалмай, бының өсөн уларға оло рәхмәтебеҙҙе белдерәбеҙ», - ти «Хәйбулла ирекмәндәре»  хәрәкәте активисы Дилә Исҡужина.

Шулай уҡ район ветерандары советы рәйесе Ырыҫбикә Аллағолова ҡунаҡтарға махсус хәрби операцияла ҡатнашыусыларға һәм уларҙың ғаилә ағзаларына шифахана-курорт хеҙмәттәре күрһәтеү тураһында һөйләне.