Фёдоровкала - ҡорбан ашы

Бер генә көн дә буш тормай беҙҙең ауылдың мәҙәниәт усағы. Бөгөн унда диндарҙар йыйылды. Мосолмандар өсөн изге булған Рамаҙан айы алдынан «Хуш киләһең, Рамаҙан» тип аталған сара ойошторҙо ауылдаштар, ҡорбан ашына йыйып. Хәйбулла районының имам-хатибы Муса хәҙрәт, ауылдашыбыҙ Юлай хәҙрәт менән берлектә махсус хәрби операцияла һәләк булған яугирҙарыбыҙ рухына, әле яу ҡырында йөрөгән егеттәребеҙҙең именлегенә бағышлап доғалар ҡылды. Район ағинәйҙәре башҡарыуындағы мөнәжәттәр сараға йәм өҫтәне. Әйткәндәй, ҡорбан ашына тип инселләп һарыҡты ауылдашыбыҙ Солтанов Динар салһа, байрам табынын ойоштороуға үҙе лә яу ҡырында йөрөгән ауылдашыбыҙ Илмир Сынбулатов өлөш индерҙе. Һәр ваҡыттағыса, ауылыбыҙҙың уңған ҡатын-ҡыҙҙары изге ниәтле табынды һә тигәнсе әҙерләп, баштан алып аҙағына тиклем атҡарып сыҡты ошо матур сараны. Сауаптары насип булһын, салған ҡорбандарыбыҙ ҡабул булһын, еребеҙгә тиҙерәк тыныслыҡ килеп, ир-егеттәребеҙ тиҙерәк тыуған яҡтарына әйләнеп ҡайтһын!