Иман йорто ҡалҡты

Тантаналы сарала район хакимиәте башлығы Рөстәм Шәрипов, “Башҡорт баҡыры” йәмғиәтенең генераль директоры Александр Туленков, Өфө ауыл биләмәһе башлығы Даян Кәримов, Хәйбулла мосолмандары имам-мөхтәсибе Муса хәҙрәт, мәсеттең имамы Рәис хәҙрәт, дин әһелдәре, ауыл халҡы ҡатнашты.

Рөстәм Шәрипов мәсет асылыу айҡанлы ауыл халҡын ҡотлап үтте.

-                 Бөгөн ауыл халҡы өсөн көтөп алған әһәмиәтле ваҡиға. Аллаһы Тәғәләнең ризалығы менән ниәтебеҙ тормошҡа ашып, бер йыл эсендә Петропавловкала матур мәсет ҡалҡты. Киләсәктә бында аҙан тауыштары тынмаҫ, төрлө дини йолалар башҡарылыр тигән ышаныстабыҙ. “Башҡорт баҡыры” йәмғиәтенең генераль директоры Александр Туленковҡа мәсет төҙөүҙә финанс ярҙамы өсөн рәхмәт белдерәм. Бөгөн районда 28 мәсет эшләп килә. Быйыл өсөнсө яңы мәсет үҙ ишектәрен асты. Киләһе йылда бында төҙөкләндерү эштәре башҡарыласаҡ,  - тине ул һәм мәсеткә бүләк тапшырҙы. 

Ауылда аҙан тауышы тынмаһын, иман йортонда кеше һәр ваҡыт күп булһын.