Бүребай комбинатына - лайыҡлы награда

Мәскәүҙә уҙған 26-сы "Алтын көҙ" бөтә Рәсәй агросәнәғәт күргәҙмәһенә "Бүребай тау-байыҡтырыу комбинаты" акционерҙар йәмғиәте Рәсәй Ауыл хужалығы министрлығының Рәхмәт хатына лайыҡ булды.

Ауыл биләмәләрен һәм агломерацияларын үҫтереүгә индергән өлөшө һәм "Ауыл биләмәләрен комплекслы үҫтереү" программаһын тормошҡа ашырыуҙа әүҙем ҡатнашҡаны өсөн комбинат коллективына рәхмәт белдерелде.
Әйткәндәй, тап РФ Ауыл хужалығы министрлығы "Ауыл биләмәләрен комплекслы үҫтереү" дәүләт программаһын ғәмәлгә ашырыуҙы координациялай, уның сиктәрендә тораҡ пункттарҙың инфраструктураһын яҡшыртыуға, шул иҫәптән социаль объекттар төҙөүгә йүнәлтелгән бик күп проекттар бойомға ашырыла. Һәм бындай бәйләнештең сағыу миҫалдарының береһе - уҙған йылда Бүребай ауылында асылған "Таусы" физкультура-һауыҡтырыу комплексын төҙөүгә һәм йыһазландырыуға сығымдарҙың 50 процентын Бүребай тау-байыҡтырыу комбинатының  финанслауы тора. Хәтерегеҙгә төшөрәбеҙ, был проектты тормошҡа ашырыуға федераль бюджеттан 33 миллион һум бүленгән, республика 12 миллион һум йүнәлткән, йәнә 1,4 миллион һум - муниципалитет. Спорт учреждениеһын төҙөүгә "Бүребай тау-байыҡтырыу комбинаты" акционерҙар йәмғиәте 36,7 миллион һумдан ашыу аҡса бүлгән. Шулай уҡ комбинат проект эштәренә 5,5 миллион һум һәм шул уҡ күләмдә спорт тренажерҙары һатып алыуға йүнәлтә.

Федераль ведомствоның рәхмәт хаты "Бүребай тау-байыҡтырыу комбинаты" акционерҙар йәмғиәтенең биләмәне үҫтереүҙә әүҙем ҡатнашыуын күрһәтә. Был ваҡиға Республика көнөндә айырыуса әһәмиәтле булды, һәм предприятие үҙенең кесе Ватанын һәм бөтә Башҡортостанды үҫтереүгә йүнәлтелгән эшмәкәрлеге өсөн билдәләнде.