Юлбарыҫ ауылында У.Х. Таймасовтың фермер хужалығында 300 баштан ашыу һарыҡ оҙон ҡышты имен-аман үткәргән. Көндәр йылынып, йәшел үлән моронлана башлау менән малҡайҙарҙы йәйге көтөүлектәргә сығарғандар.
Тар кәртә-ҡураларҙан иркенлеккә сыҡҡан малҡайҙарҙың сабышыуы, йәшел үлән еҫен һиҙеп, һауаны еҫкәп фырш-фырш итеп тын алыуҙары, кем көслөрәк тип һөҙөшөүҙәре үҙе бер тамаша.
Имен-һау булһын мал-тыуарҙар. Һәр ауыл кешеһенең иң изге теләктәре инде был һүҙҙәр. Ямғырлы-ҡояшлы, бәрәкәтле йәйҙәр килһен!