Ҡыярҙы... яңы йыл башланғас та сәсә

 

– Эшкә тотонор алдынан орлоҡто хәстәрләү – иң мөһиме, – ти әңгәмәсем. – Яҡшы баҡсасы сифатлы орлоҡтан ғына мул уңыш аласағын белә. Ҡыяр үҫтереүҙе “Маша F1” сортынан башланым, ул теплица өсөн иң ҡулайлыһы. Йыл һайын 200 – 300 төп ҡыяр сәсәм,  ҡыяр үҫентеләрен ултыртҡанда, төрлө сорттарҙы һынап ҡарайым, оҡшағандарын киләһе йылға ҡалдырып, тағы ла сәсәм. Һәр саҡ үҙ-үҙен һеркәләндереүсе орлоҡтарҙы алам, шунһыҙ уңыш юғары булмаясаҡ. Күптәр кеүек минераль ашлама ҡулланыу яғында түгелмен, органиктарға ғына өҫтөнлөк бирәм. Уныһы ла ҡул аҫтында булған тиреҫ менән көл генә.

 

Орлоҡто хәстәрләп, уларҙы махсус һауыттарға сәскәндән һуң, оҙон ҡышҡы кистәрҙә полиэтилен япманы ҡатлап үтек менән йәбештереү эше башлана. Ул әҙер булғас, теплица урынын ҡарҙан таҙартып, әҙерләп ҡуям, пленка менән ҡаплайым. Артабан мейесенә бер нисә көн туҡтамай ут яғып, ерҙе йылытам, аҙаҡ түтәлдәр эшләйем.

 

Көнө-төнө мейес яғыла, ҡыяр үҫтереүҙә төндә температураның 18 градустан да кәм булмауы талап ителә, көндөҙ 25-тән төшмәҫкә тейеш. Ә бының өсөн, уйлап ҡарағыҙ, күпме утын яғыу талап ителә?! Теплицаны уратып помидор үҫентеләрен ултыртам, ҡыяр миҙгеле бөтөүгә, улары тупылдашып өлгөрә, – тип йылмая Вәзәм уңғаны Мансур Харис улы.