Өс дуҫ үҙ аҡсаһына яугирҙар өсөн машина һатып алған

Асҡын районынан махсус хәрби операция зонаһына сираттағы гуманитар йөк оҙатырға йыйыналар. Был юлы асҡындар, медикаменттар һәм аҙыҡ-түлек тейәлгән посылкаларҙан тыш, ике транспорт әҙерләгән.

Хакимиәт башлығы Динис Йосоповтан билдәле булыуынса, Ҡашҡа ауылынан өс дуҫ: Рәсүл Зиннәтуллин, Ришат Лотфуллин һәм Ришат Фәйезов үҙ аҡсаһына «Нива» һатып алған.

«Беҙ өс класташ, өс дуҫ. Алғы һыҙыҡтағы егеттәр менән шылтыратып һөйләшеп торабыҙ. Улар машина һораны», – ти Рәсүл Зиннәтуллин.

Ә Ҡубыяҙ ауылы фермеры Рәдиф Ғарифуллин махсус операцияла ҡатнашыусылар өсөн УАЗ машинаһы һатып алған. Ике транспорт та мобилизацияланған яҡташтарының теләктәрен иҫәпкә алып нығытылған.