Ҡара ҡарағаттан тиҙ эшләнә торған ҡайнатма

Һеҙгә ҡара ҡарағаттан желе кеүек килеп сыҡҡан тәмле ҡайнатма рецебын тәҡдим итәбеҙ.

Ике стакан һыуға алты стакан шәкәр ҡомо ҡушып, сироп ҡайнатабыҙ. Шәкәре иреп бөткәс, һигеҙ стакан ҡарағат өҫтәйбеҙ. Биш-ете минуттан ашыу ҡайнаһа, ҡуйы килеп сыҡмай, шуға һүрән утта аҙ ғына бешереү кәрәк.

Унан һуң утты һүндереп, ике-өс стакан шәкәр ҡомо һалып, иреп бөткәнсе болғатып тороғоҙ. Стерилләнгән банкаларға эҫе килеш тултырып ябығыҙ.

Ҡыш йәй тәмен тойоп, рәхәтләнеп ҡарағат ҡайнатмаһы менән сәй эсеүгә ни етә!

Ә һеҙ ҡара ҡарағат ҡайнатмаһын нисек эшләйһегеҙ? Рецепттарығыҙ менән уртаҡлашһағыҙ ине.

Фото: "Ләйсән туташ" төркөмөнән.