Ҡуҙғалаҡтан ваҡ бәлеш менән сәй эсәйек

Ҡуҙғалаҡтан тәмле генә ваҡ бәлеш бешерәйек (духовкала).

Кәрәк була:
3 стакан он, 0,75 стакан һөт, 2 йомортҡа, 5 аш ҡалағы шәкәр, 70 г аҡ май, 7 г әсетке, тоҙ алына. Эслек өсөн 300-400 г ҡуҙғалаҡ, 0,5 стакан шәкәр, 1 аш ҡалағы крахмал.

Йылы һөткә, әсеткене алдан шәкәр менән бутап күпертеп алып, ҡамыр баҫығыҙ. Уны 1-2 сәғәткә ҡуйып тороғоҙ. Ҡуҙғалаҡты йыуып, һыуын һарҡытып, ваҡ итеп турағыҙ. Унан шәкәр һәм крахмалды һалып бутағыҙ.

Ҡамырҙы йоҡа итеп йәйеп ваҡ бәлештәр әҙерләгеҙ. Бер йомортҡаны һытып, туҡып, шуның һәр береһенең тышына һөртөп сығығыҙ.

Духовканы 190 градусҡа ҡыҙҙырып, 20 минут бешерәбеҙ.

Сәйҙәрегеҙ тәмле булһын!