Орлоҡтарҙы нисек һайларға?

Фасовкалау алдынан орлоҡтарҙы, ғәҙәттә, сифатын күтәреү өсөн эшкәртәләр. Пакеттарҙа гель ҡушылған, дражелау, инкрустациялау һәм башҡа терминдарҙы күрергә мөмкин. Уларға аңлатма биреүҙә  белгестәр ярҙам итәсәк.

Гель ҡушылған орлоҡтар. Улар махсус гель капсулаһына урынлаштырылған, ул дымды һаҡлай. Был орлоҡтарҙың шытып сығыу мөмкинлеге юғары.

Лазер менән эшкәртеү. Орлоҡтарҙы сәсеү алдынан инфраҡыҙыл лазер менән эшкәртеү уларҙың ауырыуҙарға ҡаршы тороу һәләтен яҡшырта һәм шытып сығыу мөмкинлеген арттыра.

Плазма менән эшкәртеү. Экологик ысул. Орлоҡтарҙы түбән баҫымлы газ мөхитенә һалалар, был шытып сығыу мөмкинлеген арттырыуға һәм ауырыуҙарҙан һаҡлауға булышлыҡ итә. Бындай эшкәртеү орлоҡтағы үҫеү процестарын әүҙемләштерергә ярҙам итә.

Инкрустацияланған орлоҡтар. Өҫкө йөҙҙә пленка барлыҡҡа килтереүсе махсус составтар менән эшкәртелә. Орлоҡтарҙы эшкәртеүсе эретмә составына төрлө матдәләр инә, улар уларҙы ауырыуҙарҙан һаҡлай һәм тиҙ шытып сығыуға булышлыҡ итә, әммә йыш ҡына уларҙың химик өлөшө бар. Ҡышҡы сәсеү өсөн яраҡлы.

Драже рәүешендәге орлоҡтар. Был эшкәртеү ваҡытында орлоҡтар дражираторға урынлаштырыла, унда улар торф һәм серетмә, һыйыр тиҙәге, суперфосфат, калий, азот, бактериаль ашламалар, микроэлементтар, үҫеү стимуляторҙары ҡатнашмаһынан торған тығыҙ тышлыҡ менән уратыла. Орлоҡтар ҙурая һәм түңәрәк формаға эйә була. Шулай уҡ ҡышҡы сәсеү өсөн яраҡлы.

Орлоҡтар-спринтерҙар. Әгәр һеҙ үҫентеләр сәсеүҙе һуңлаһағыҙ, алмаштырғыһыҙ буласаҡ. Махсус эшкәртеүгә дусар булған (үҫентеләрҙе уятып, һуңынан туңдырыу) спринтер орлоҡтар сәселгәндән һуң әүҙем үҫә башлай, ғәҙәти орлоҡтарҙан күпкә алдараҡ. Тик шуны ғына иҫәпкә алырға кәрәк: көҙ көнө бындай орлоҡтарҙы сәсергә ярамай.

фото: Азамат Абдрафиков