Ҡар бабай ҡайҙа булған?
Епшек ҡарҙы тәгәрәтеп
Әүәләнем ҡар бабай,
Уны яһау ҡыйын түгел,
Уны яһау яп-ябай.
Өс йоморсаҡ етеп ҡуйҙы
Кәүҙә менән башына,
Танау итеп кишер ҡуйҙым,
Ҡара буяу – ҡашына.
Ике күҙе – ике төймә,
Тешһеҙ ауыҙ – сыбыҡтан,
Аяғында иҫке галуш,
Ә ҡулдары – ҡабыҡтан.
Бөгөн сыҡһам, ҡар бабай юҡ,
Шул ҡәҙәре ашыҡҡан:
Кишерҙе лә ташлап киткән,
Галушһыҙ юлға сыҡҡан.
Ике төймә – ике яҡта,
Аунап ята ҡабыҡтар,
Әле йәшәү ҡыйындыр шул
Ҡар бабайға ҡар юҡта.
Гүзәл Ситдыҡова
+23 °С
Болотло
