Бүребайҙа төҙөкләндереү эштәре дауам итә

Бүребай ауылында үҙәк урам - Зәки Вәлиди урамы тағы ла күркәмләнгән. Бында яңы ҡоймалар, шул иҫәптән декор элементтары менән металл ҡоймалар барлыҡҡа килә, улар тораҡ пункттың дөйөм ҡиәфәтенә берҙәм күренеш бирә. Бынан тыш, сүп-сар өсөн урналар менән эскәмйәләр ҡуйылған. Хәҙер Бүребай халҡы һәм ҡунаҡтары йәйәү йөрөгәндә уңайлы ял итә ала.

Бүребайҙы төҙөкләндереү программаһын тау-байыҡтырыу комбинаты социаль партнерлыҡ сиктәрендә икенсе йыл тормошҡа ашыра, һөҙөмтәлә ауыл биләмәһе урамдары күпкә матурыраҡ һәм уңайлыраҡ була. Шулай уҡ предприятие ике урамға яҡтыртытҡыс ҡоролмалары ҡуя, был уларҙы уңайлы һәм хәүефһеҙерәк итә.

–Тыуған Бүребайҙың нисек үҙгәргәнен күреү бик ҡыуаныслы. Был ыңғай үҙгәрештәр урындағы халыҡты ғына ҡыуандырмай – ҡунаҡтар ҙа уның көндән-көн матурыраҡ һәм уңайлыраҡ булыуын билдәләй, – ти Бүребай ауыл советы ауыл биләмәһе хакимиәте башлығы Евгения Волошина.

Ауыл халҡы уңайлы шарттарҙа тейешле медицина ярҙамы ала алһын өсөн, Бүребай тау-байыҡтырыу комбинаты табип амбулаторияһы кабинеттарына 9 кондиционер урынлаштыра.

–Кондиционерҙар ҡуйыу беҙгә уңайлы шарттарҙа пациенттарҙы ҡабул итергә мөмкинлек бирәсәк, был үҙ сиратында эшебеҙҙең һөҙөмтәлелеген һәм хеҙмәтләндереү кимәлен арттырасаҡ, – ти табиптар һәм райондың һаулыҡ һаҡлау системаһына даими ярҙам күрһәткәндәре өсөн тау-байыҡтырыу комбинаты етәкселегенә һәм коллективына рәхмәт белдерә.