Хәрби хәрәкәттәр ветерандары көнө билдәләнде

Митингта ҡатнашыусылар Хәрби хәрәкәттәр ветерандарына арналған стелаға сәскәләр һалып, илебеҙ именлеге өсөн хәри бурыстарын үтәгәндә һәләк булған райондаштарыбыҙҙы бер минут тынлыҡ менән хөрмәтләп иҫкә алдылар.

Ҡайнар нөктәләрҙә хеҙмәт иткән яҡташтарыбыҙҙы район хакимиәтенең йәштәр сәйәсәте, физик культура һәм спорт бүлеге етәксеһе Илнур Мәмбәтов, «Хәрби туғанлыҡ» Бөтә Рәсәй ветерандары йәмәғәт ойошмаһының Хәйбулла районы бүлеге етәксеһе Ирғәле Байназаров, район ветерандар советы рәйесе Ырыҫбикә Аллағолова тәбрикләп, Хәрби хәрәкәттәр ветерандарына изге теләктәрен, рәхмәт һүҙҙәрен еткерҙеләр һәм махсус хәрби операциянан ваҡытлыса ялға ҡайтҡан яугирҙарға тыуған ерҙәренә Еңеү менән имен-аман ҡайтыуҙарын теләнеләр.

Артабан Аҡъяр ауылындағы Төньяҡ-Көнсығыш биҫтәһе паркында махсус хәрби операция биләмәһендә ҡатнашҡан яҡташ яугирҙарыбыҙға арналған һәйкәлгә сәскә һалыу тантанаһы уҙҙы.

Шулай уҡ байрам уңайынан балалар һәм үҫмерҙәр спорт мәктәбе майҙансығында махсус хәрби операциянан ваҡытлыса ялға ҡайтҡан яугирҙар һәм махсус хәрби операция ветерандары араһында ГТО буйынса норматив тапшырыу ҙа ойошторолдо.

Һуғыш хәрәкәттәре ветерандары һәм бөгөнгө көндә ил тыныслығы өсөн көрәшеүселәр — ҡаһарманлыҡ һәм илһөйәрлек өлгөһө ул.

Тыуған ил өсөн ғүмерен биргәндәрҙең хәтерен мәңгеләштереү, хәрби хәрәкәттәрҙә ҡатнашыусыларға ихтирам уятыу, рәхмәт белдереү, яҡындарын хөрмәт һәм хәстәрлек менән уратып алыу беҙҙең изге бурысыбыҙ.