Йәш табиптарға уңыштар теләйбеҙ!

Һуңғы арала республика етәкселегенең медицина өлкәһенә ҙур иғтибар биреүе сикһеҙ ҡыуандыра. Юғиһә, халыҡтың һаулыҡ һаҡлау системаһындағы етешһеҙлектәргә бер туҡтауһыҙ дәғүәләр белдереүе бигерәк күңелде ҡыра ине. Проблеманы хәл итеү маҡсатында Башҡортостан Республикаһында “Ауыл докторы” проектын бойомға ашырыу дауам итә. Проект айырыуса республиканың алыҫ райондарында йәшәүсе ауыл халҡына медицина ярҙамы күрһәтеүҙең сифатын яҡшыртыуға йүнәлтелгән. 2024 йылда ошо программа сиктәрендә районға 4 йәш белгес эшкә килгән. Улар менән Аҡъяр үҙәк район дауаханаһының баш табибы Рәмилә Шәрипова таныштырҙы.

Воротникова Мария Сергеевна - Бүребай табип амбулаторияһының участка табип-терапевты.
Аҡъяр ауылында тыуған, мәктәптән һуң Ырымбур дәүләт медицина университетына "Дауалау эше" һөнәре буйынса уҡырға инә. 2024 йылда университетты уңышлы тамамлай һәм тыуған районына эшкә ҡайта..

Юламанов Айтуған Рәфҡәт улы стоматология бүлегенең табип-стоматологы.
Сығышы менән Хәйбулла районының Ғәлиәхмәт ауылынан.  Башҡорт дәүләт медицина университетына «Стоматология» һөнәре буйынса уҡырға ингәс, маҡсатлы йүнәлеш алырға ҡарар итә. Юғары уҡыу йортон тамамлағандан һуң 2024 йылда ҡатыны Юламанова Ләйсән Ғафурйән ҡыҙы менән районға эшкә ҡайта.

Юламанова Ләйсән Ғафурйән ҡыҙы - поликлиниканың табип-эпидемиологы.
Салауат районы Малаяҙ ауылында тыуған. Башҡорт дәүләт медицина университетын тамамлағандан һуң, 2021 йылдан 2023 йылға тиклем Башҡорт дәүләт медицина университетында «Эпидемиология» һөнәре буйынса ординатура үтә. Шулай уҡ Өфө ҡала клиник перинаталь үҙәгендә табип-эпидемиолог булып эшләй.

Усмонов Рустамджон Әмирхәмзә улы - поликлиниканың балалар хирургы.
2022 йылда Хатлон дәүләт медицина университетын «Педиатрия» һөнәре буйынса тамамлай.
2024 йылда Башҡорт дәүләт медицина университетын "Балалар хирургияһы" һөнәре буйынса ординатура тамамлай. Ординатура буйынса практиканы Аҡъяр үҙәк район дауаханаһында үтә һәм артабан ошо медицина учреждениеһында эшкә ҡалырға ҡарар итә.

Йәш белгестәргә эштәрендә уңыштар һәм бик күп рәхмәтле пациенттар ғына теләйбеҙ. Гиппократ антына тоғро ҡалығыҙ!