Йәш белгестәрҙе районда көтәләр

Өфөлә Башҡорт дәүләт медицина университеты студенттары менән файҙалы һәм йөкмәткеле осрашыу үтте. Бының тураһында социаль селтәрҙәрҙә Аҡъяр район дауаханаһының баш табибы Илшат Рысҡужин хәбәр ите.

"БДМУ-ла Хәйбулла районынан 40-ҡа яҡын студент, шул иҫәптән 20 буласаҡ терапевт белем ала. Осрашыуҙа студенттарҙы райондың ҡаҙаныштары һәм проблемалары, Аҡъяр үҙәк район дауаханаһында эшләү шарттары, медицина хеҙмәткәрҙәренә ярҙам итеү программалары менән таныштырҙыҡ.
Бөгөнгө көндә Аҡъяр үҙәк район дауаханаһына табип-дерматовенеролог, травматолог-ортопед, акушер-гинеколог, балалар хирургы, невролог, эндокринолог, онколог, хирург, анестезиолог-реаниматолог, участка терапевтары һәм педиатрҙар талап ителә. Тиҙҙән беҙҙең дауахана табиптары сафтары үткән осрашыуҙа ҡатнашыусылар менән тулыланыр тип ышанабыҙ" - тип яҙҙы Илшат Тимерйән улы.