Сир яңынан үҫә башланы

Коронавирус буйынса хәл илдә даими рәүештә үҙгәреп тора. Мәҫәлән, уҙған аҙнала вирустың таралыу коэффициенты Башҡортостан буйынса 0,9 һәм Рәсәйҙә 1,1 булһа, был аҙнала республикала 1,0 балға, илдә 1,1 баллға күтәрелгән. Был турала бөгөн Хөкүмәттең оператив кәңәшмәһендә һаулыҡ һаҡлау министры Айрат Рәхмәтуллин һөйләне.

Республикала һуңғы тәүлектә коронавирус инфекцияһын йоҡтороуҙың 183 осрағы теркәлгән. 177 пациент стационарҙа дауалана ( һуңғы тәүлектә 30 кеше өҫтәлгән). Ә 2187 кеше өй шарттарында дауалана (тәүлегенә тағы 153 пациент).

Республиканың йоғошло сирҙәр госпиталдәрендә яңы коронавирус инфекцияһынан дауалау өсөн 390 койка әҙерләнгән, буш койка фонды 27 процент тәшкил итә. 3 251 504 кеше вакцина һалдырған, 948 460 кеше (66,5 процент) ревакцинацияланған.

Эпидемиологик миҙгел башланғандан алып Башҡортостанда киҫкен респиратор вирус инфекцияһы менән сирләүҙең 287 992 осрағы теркәлгән. 10 мең кешегә күрһәткес 57,7 тәшкил итә, был алдағы аҙна менән сағыштырғанда 24 процентҡа күберәк. Бөгөнгө көнгә Башҡортостанға 1 807 760 доза грипҡа ҡаршы вакцина килтерелгән, 1 623 028 кешегә прививка яһалған.

Халыҡҡа профилактик медицина тикшереүе үткәреү дауам итә. Диспансеризациялауҙың беренсе этабын 926 396 кеше үткән (пландың 88,8 проценты), 214 599 кеше (93 процент) – һөнәри тикшереү үткән һәм 315 888-е (88,5 процент) өҙлөгөүҙәрҙе иҫкәртеү өсөн тәрән диспансеризация үткән.

Фото: v-kurse.ru