+29 °С
Болотло
ЙӘМҒИӘТ
24 Март 2021, 15:31
“Һуғыш осоро балалары, һеҙ балалыҡты белмәнегеҙ”
Республиканың Хәрби дан музейы һуғыш осоро балаларына ярҙам тураһындағы закон проектын хуплауы тураһында белдерҙе.
“Берҙәм Рәсәй” партияһы депутаттары Дәүләт Йыйылышы – Ҡоролтайға бала сағы һуғыш йылдарына тура килгәндәргә мөһим статус биреү һәм ярҙам сараларын күреү тураһында закон проекты индерҙе.
Ошо йәһәттән республиканың Хәрби дан музейы был башланғысты хуплауы тураһында белдерҙе.
“Ваҡыт бик тиҙ үтә. Бөйөк Ватан һуғышы ветерандары әҙ генә ҡалды. Һуғыш осоро балалары тип аталғандар ҙа оло йәштә. Башҡортостан депутаттарының закон проектын хуплайбыҙ, уны көнүҙәк һәм ваҡытлы тип иҫәпләйбеҙ. Яу йылдарында заводтарҙа, баҫыуҙарҙа эшләгән балаларға, үҫмерҙәргә ярҙам итеп өлгөрөү мөһим. Беҙҙең музей ҡараған темаларҙың береһе һуғыш осоро балаларына арналған. Беҙҙә тематик саралар, ветерандар, шул иҫәптән яу йылдары балалары менән осрашыуҙар даими ойошторола”, – тине музей директоры Илшат Үтәев.
Музейҙағы тематик күргәҙмәгә – “Һуғыш осоро балалары, һеҙ балалыҡты белмәнегеҙ” тип аталған экспозицияға уҙған быуаттың 30 – 50-се йылдарында ауыл-ҡалаларҙағы балалар тормошон, эшмәкәрлеген сағылдырған фотолар, әйберҙәр ҡуйылған, тылдағы йәшәйеш күрһәтелгән. Улар менән музей сайтында (сайт) танышырға мөмкин.
Башҡортостандың “Һуғыш осоро балалары” статусын биргән закон проекты 1927 йылдың 22 июненән 1945 йылдың 3 сентябренә тиклем тыуған балаларға ҡағыла. Ул быйыл майҙан көсөнә инер тип көтөлә.
Автор: Рәмилә Мусина
